| 1 |
Qiiʔaƛ huuʔak ʔuyi qiisasa. wikyuuyiič hinatšiƛ ʔaḥ Europeans, mamaɬn̓i. qiiʔaƛ ƛukʷatqcaqa. ƛuukʷaana. ƛ̓iiʔiɬ ʔaatḥiy̓u ciqšiƛ quuʔasʔi, ʔiiqḥuk ʔin ƛuukʷaanaw̓it̓as. haa čačamḥiʔick waaʔaƛ ʔiiḥp̓iitʔi. ʔiiḥp̓iit waa, ʔaya. |
| 2 |
ʔayaʔatḥitwaʔiš manuuisʔatḥ huuʔak ʔuušcpaamitwaʔiš suč̓ap̓it suč̓iiq. hišuusʔaɬ ʔaatḥiy̓u hiiɬ ʔink ḥaaɬ ʔappiʔiɬʔi ʔink. heey, w̓ačiƛ, w̓ačiƛ qʷayac̓iik. qʷaamitiiʔaaɬ huuʔak hitaatamitʔaɬ ɬuucsamiiḥ, qʷaaʔiitq y̓uuqʷaa čaakupiiḥ nuutiic. |
| 3 |
Hitaʔatap ʔustpitap. č̓iḥiy̓ap t̓iʔuup ʔuuštup qʷaaʔiitq, ʔaqʔištiik, ƛ̓učum. wiƛ̓ukʷiƛ, saayiiʔiƛ qʷayac̓iik c̓iiqaa ɬuucsamiiḥ y̓imy̓aaxa. muup̓ititquu hiniip̓at ḥaw̓iɬʔi. sukʷiƛ. hiniiʔas qʷayac̓iik naʔaaʔat, m̓aasuuɬšiƛ hiɬtqyaapaɬʔi ʔaḥ. |
| 4 |
Kʷiisḥinatuk qʷayac̓iik. ʔuuqstii. čuu, kaƛḥšiʔaƛ. ʔiiqḥuk̓ʷaƛ ḥaw̓iɬʔi ʔin ʔukʷaaɬ, ʔukʷaaɬ, ḥaaw̓iɬaƛ̓i. kaƛḥšiƛ. saʕaaquwaʔiš. nism̓a hiɬʔaƛ ʔaḥ saʕaaquwaʔa. numap̓at̓u ƛaʔuu siixp̓aackum. saacsuḥta. n̓aacsiičiƛ qʷayac̓iikm̓inḥʔi, ʔuuštup hiɬačišt tup̓aɬ ʔaya qʷaaƛaa hiiɬtqyaap̓aɬʔi. |
| 5 |
Hiiniicc̓iʔat sukʷiʔat wiḥiʔuƛ qʷayac̓iik, susw̓isčaʔa. ʔaya, hiiniicc̓iʔat. k̓aaḥapiʔiš ʔaḥ hiiɬtqyaap̓aɬ sayaač̓a, sayaač̓amatak. maasuuɬšiʔaƛƛa qʷayac̓iikʔi, muup̓itʔaƛ. heey maasuuɬšiƛ y̓uuqʷaa kʷiisḥinatuk. ʔuyaasiɬa ḥaw̓iɬi. |
| 6 |
Huḥtakšiƛ ʔin kʷisiɬa. takaasʔaƛƛa ʔaḥ hiitaaḥt̓uuɬ yaqii saʕaaquw̓aʔa. maasuuɬšiʔaƛƛa, qʷayac̓iikʔi ʔaya. čuu, ciqsiʔat. huuʔak ʔuyi qʷaackʷiyii naʔaackʷi qʷayac̓iik ʔuukʷiɬ quuquuʔas, qʷaaq siy̓a, quuʔas qʷaaʔiitk. naʔaa. |
| 7 |
Qʷaa y̓uuqʷaa maamaati. naʔaact̓aɬ, naʔaact̓aɬ. takst̓uʔiƛ. ʔucaḥtačiƛ ḥuuɬ. takaas ƛuukʷaana waɬyaqiɬʔi. ƛuukʷaanaʔaɬ ƛaaʔuuʔaƛ. waa ʔaḥʔaaʔaƛ, č̓apyiiʕaƛ ḥaaw̓iɬaƛ. č̓apyiiq. waa ƛ̓apḥšiʔat qʷayac̓iik numap̓at̓u histaqšiƛ. |
| 8 |
ƛaʔuuʔi ḥaaw̓iɬaƛ. qaɬaatikʔitquu. čuu, yaacšiƛ qʷayac̓iikʔi. hawiɬčaqšiƛ̓aɬ ƛuukʷaana. ʔiiqḥuk̓ʷaƛ ʔin hiniicc̓iʔat qʷayac̓iik, qʷayaac̓iksaʔi, saštupʔi čamiḥta. haptšiƛ qʷayac̓iikʔi hayimḥimtwaʔišʔaɬ yaqii quuʔas. ʔiiḥcamisʔiš ƛuukʷaana. |
| 9 |
ʔucačiƛ takaaqtu, mačɬii. naʔaaʔaƛquuč mačɬaatʔatḥ c̓iiqaa ḥaaw̓iɬaƛ̓ti. naʔaaʔat maan̓uuʔisʔatḥiicʔi c̓iiqy̓ak. waa ʔucačiƛ ḥuuɬ t̓ašiis. t̓ašiis. yaaqʷiɬqin Tahsis waa. Sawmill hiɬʔiitq. yacaaqtuu ʔucačiƛ ʔuuƛ̓aqči. hisiik huḥtak. |
| 10 |
Hiy̓atḥckʷi, nučaaɬʔatḥ, ʔuuƛ̓aqči. hiʔacačit̓išʔaɬ ƛah nučaaɬʔatḥ ʔiqʔiiʔas, histaqšiƛ nučaaɬ. naʔaaʔaƛ qii wiinapi qʷayac̓iikʔi. muučiiɬitquu. hinʔay̓aqƛ ʔin ʔuyaa hiitkin, hiitkin n̓aas. ʔaaḥʔasa wiiʕaqƛ̓aɬ hišuk, wiiʕaqƛ hinaasʔat, hinaas, ʔin ʔuusḥhii qʷayac̓iikʔi. |
| 11 |
ʔucačiƛ qaay̓uuk̓ʷatḥ hiɬstiis takʷiiʔa. waa ʔucačiʔaƛƛa ʔuuʔuukiniš, čiiqƛisʔatḥ. c̓iiqaaʔaƛquuč ʔaatḥšiƛ. ʕac̓ikšiƛ ḥaaw̓iɬaƛ̓i č̓aʔuy̓ic qʷiʔiiʔitq qʷayac̓iikʔi, muwač. ʔuḥuk haʔum muwač, haʔukʷaƛquuč. waa ʔuʔiic ƛ̓aqapt. |
| 12 |
ƛ̓aqapt yaaqʷiɬ mamaɬn̓i herbs waa ʔuʔiic haʔuk. wik̓aƛquuč ʔaaʔaayaqƛapi, ʔumaak ʔaḥ p̓usšiƛquu, tuxʷiiḥaquu, ʔin ƛ̓ay̓ix qʷayac̓iik. ʔin ƛ̓ay̓ix. č̓iič̓iikḥta ḥuuɬ. wik kamatquk. saʔak qʷaaʔiitq ƛ̓ay̓ix, čimt̓a ḥaaw̓iɬaƛ̓i. |
| 13 |
Hinas ḥaaɬ muutwiiʔiɬuk. qʷaa y̓uuqʷaa ʔaƛakʷaɬ. hiɬʔapʔat ʔaḥ ʔappiʔiɬʔi. ḥaʔiḥtisʔaƛ čaʔakʔi, nuučaan̓uɬʔi, waa huʔacačiƛ ʔiqsčiik huʔap̓in. waa ʔucačiʔaƛ hiy̓atḥuusitii ʕuc̓uusʔatḥ, ʕuc̓uusʔatḥ, w̓apuukḥ. hitawiiʔis qucačiʔaƛ ƛaʔuukʷiʔatḥ, Clayoquot waa, ƛaʔuukʷiʔatḥ. |
| 14 |
Hašiičiʔaƛ maatmaas. ḥaʔiḥtisaƛ ʔucačiƛ niitiinaʔatḥ. ʔaniyaƛquuč wiinapuƛ tupʕaqstuʔaƛquu. hisiikʔaɬ nuučyuu, ƛ̓aatḥapiʔi ƛ̓atḥaʔi, kaapsapi. hisiik qʷayac̓iikʔi n̓aacsaʔat ḥuu sayaač̓a. hey wik̓aƛ wiinapuƛ saayaa. qiiʔaƛ. |
| 15 |
Waa hinasiʔaƛ muuqumɬ hupaɬ. ʔunc̓ukʷis muuqumɬ hupaɬ. čuu, wiinapuʔaƛ ʔuušsaac̓u hiɬḥitii ʕaʔuk ʔiiḥ ʕaʔukʷaq wiinapuƛ̓aɬ. ʔuyiiʔaƛ̓atquuč tiičma ḥaaw̓iɬaƛ̓aɬ ʔuʔiic̓ap̓at tiičma muwač, waa ḥismisukʔ muwač ʔuʔiič naqšiʔaƛquuč. |
| 16 |
ʔutwiiʔap̓aƛ̓atquuč haʔuk, ʔaḥʔaaƛ qʷayac̓iikʔi haʔukšiʔaƛ. hiiɬaqsiʔisʔaƛquuč qʷayac̓iikʔi ʕaʔukʔi, ʔiiḥ ʕaʔuk. haaʔumtaqaƛquuč, ʔunaak qʷayac̓iikʔi ƛ̓ay̓ix. ƛ̓ay̓ix muukmuukʷa. k̓uuč̓iiḥʔic̓aƛquučʔaɬ qaḥsaap, waʔičup. wik qaḥsaap waa. |
| 17 |
Wiiy̓aat qaḥsaap waaʔat, saštup qaḥsaap̓aƛ̓atquu. qʷaa y̓uuqʷaa ʕaḥmis. wiiy̓aat qaḥsaap waaʔat, ʔuuʕiičiʔi. ʔuuʕiičiʔapikqs wawaa. qʷayac̓iikʔi c̓iiqc̓iiqa haɬim̓aaksuɬ. ʔuʔiičeepiks, ʔuʔiičeepiks, qʷayaatukʔaƛquuč ʔaḥʔaa. |
| 18 |
Qʷayac̓iikm̓inḥʔi, wik qʷaa qʷaaqin čamiḥta niiw̓a ciiqciiqa ʔuʕiičiʔatikqs. ʔuʕiičiʔatikqs waa waanaa niiw̓a. ʔaḥʔaaʔaƛ qʷayac̓iik, ʔuʔiičeetiks ʔuʔiičeetiks haɬim̓aaksuɬ. ʔaaḥʔasa ɬispingquu woɬvesʔi. čuu, yaacšiʔaƛ̓aɬ. |
| 19 |
Yaacšiƛ. ʔuʔiiyis ʔačaqʔištiik hiiʕiiʔatḥ, hiɬ qii. naʔaa ḥaw̓iɬʔi, hišuk, qum̓uusʔiq maamaḥt̓i, qum̓aaqƛ̓asʔitq. naʔaa, tuuḥukʔaɬ ʔin hiitkin qʷayac̓iikʔi, woo=kʷiisḥinatuk maasuuɬšiʔaƛquu. qʷiiʕaƛ̓aƛquuč ʔaḥ muup̓itʕaƛ, woo qʷiiʕin ʔaḥ, muup̓itʕaƛ. |
| 20 |
Hiitkinʔiš waaʔaƛ. hašiɬʔaƛ ʕimtnaak ʕimtnaak ḥaaw̓iɬaƛ̓i. kʷisiɬa ḥaaw̓iɬaƛ̓i, ƛ̓ay̓uučiƛ. wikstupsap. ʔaaḥʔasaƛquuč hisiik̓ʷaqƛ̓as ḥimqšiƛquu ʔuʔinkʷiʔisʔi suč̓as ḥimqḥimqš hisiikʔitq. qʷaa y̓uuqʷaa ḥaaɬ ʔuw̓as suč̓as ḥimqšiƛ. |
| 21 |
Qʷaa ʔaḥʔaa našukʔi ƛ̓ačšiʔaƛquuč. qʷis ʔaḥʔaa suč̓as t̓aḥʔiƛ ḥacaqc̓inƛ ʔaḥ. n̓aacsa kʷiscaqc̓uuʔi. ʔunackʔisitwaʔiš, ʔaḥuu hiɬʔaƛqin mituuni. ʔunaaʔis niiyaaʔatḥ, ʔunaaʔis. kʷisiɬaƛna ƛaḥ ḥuu sayackšiʔaƛna ʔaaʔiiktaqšiƛckʷi. |
| 22 |
Naʔaa naʔaaʔat niitiinaʔatḥ. ʔayaʔiš huḥtak, ʔayimtʔiš huḥtak, yaqʷiiyii quuʔas, ʔaḥ ʔiiqḥy̓akʔi himwic̓aqy̓akʔi waaʔaƛ ƛah. himwic̓aqy̓akʔi. yaaqʷiɬʔitq mamaɬn̓i mythology waa. čamiḥtackʷi huuʔak ʔuyi qiiʔaƛ qiisasa. huuʔaan̓uuƛ. |
| 23 |
Hihinataḥʔaƛ kʷiikʷiisaḥi. n̓aacsii hitacsuḥtaƛquuč c̓axšiʔaƛquuč ɬiʔaaʔaaqƛatquuč. ʔuušʔaƛquuč katxkʷisas. hiɬʔanitwaʔiš ʕaaʔiiʔat ʔaḥ. ʔiiḥ ʕaaʔii hiikʷaɬšiʔat k̓ʷačšiʔat. hiniip̓at. čuu, n̓upqʔičḥ. n̓upčiiɬ, waa quuʔas huuʔak. |
| 24 |
N̓upčiiɬ. n̓upqʔičḥ. n̓upčiiɬ. hinasiʔaƛ huʔap̓in ʔuʔiiʔas hiiɬtqyaap̓iiʔasʔi wikʔii sayaač̓a kʷisutaqtu. wikmatak sayaa. m̓ay̓ukšiʔatʔaɬ qʷayac̓iik. qʷaaƛaa yaqii c̓aʔak hiʔiis qʷayac̓iik, wik̓ap̓at č̓aaʔiƛ. hawiɬču ʔaḥ, huḥtak, ʔin huʔinʔaqƛ ʔuuktis hupaɬʔi. |
| 25 |
Hinaɬačiʔaƛ ʔiqyuuya. c̓ušimɬ hupaɬ, yaaqʷiɬʔitq mamaɬn̓i December waa, huʔinʔaƛ. c̓iiqšiʔaƛquuč ḥaw̓iiḥʔi, naasqnaasqš, kutḥy̓ak ʔuuḥʷ̓aɬ, muučiiɬšiƛ. kaƛḥšiƛ. wik̓iit ʔink. wik̓iit ʔink. ʔanaʔis ḥaaɬ ƛ̓ixʔaqƛ̓aʔa. ʔaaʔiiktaqyuckʷap̓atuk ʔinkʔi ƛ̓ixʔaqƛ̓aʔa ʔiq ḥaaɬ ƛ̓učqakʔi. |
| 26 |
ʔiiqm̓aak̓uk ʔaanaḥii paƛḥaa flame waaʔaƛquu. ʔiiʔiiqm̓ac̓u. ʔanat̓uuʔat ḥamip̓at quuʔas yaqčiiɬ ḥaaɬ maʔasʔi ʔiiḥ, ʔunaḥitʔi maḥt̓iimitquu. maḥt̓iimitquu. ʔaḥkuu hiɬʔaƛ ʔinkʷiɬ ʔaḥ, paƛkaa. hiiɬ ʔaḥ, t̓ašii c̓awaak ʔaḥ. |
| 27 |
Hiiɬcqiinak ʔaƛakʷaɬ, n̓aacsanak. nuutxšiʔaƛquuč wayac̓iik maḥt̓ii, qʷaaʔap muumuup̓itš, ʔeey hitaaqƛ̓iƛ. čuu, kaƛḥšiʔaƛ muučiiɬšiʔaƛ. muučiiɬšiʔaƛitq. sacsuḥtawaʔiš qʷayac̓iik yaqii ʔapquuʔa. yaqii ʔapquuʔa. hiɬʔaƛ kʷiikʷiisaḥi histakšiƛ, hišsy̓iḥtaqšiƛ. |
| 28 |
C̓axšiʔaƛquuč kʷiikʷiisaḥi ʔuʔiip̓aƛatukʷitwaʔiš c̓axšiʔat ʔaʔapyimɬʔatʔi. kiitxukčikmatakckʷiʔaaɬ hamuut. nay̓iik qʷayac̓iikʔi nakšiƛ ʕaaʔii. ʔaaḥʔasa ʕuy̓inakquu. wikiičiƛ ḥisaa. wik xʷakšiƛ. ʔuy̓aaʔaƛitwaʔiš č̓apac hiy̓aḥs ʔuušcuk. |
| 29 |
Tuxʷačištuʔaƛquuč qʷayac̓iikʔi. tuxʷačištuƛ. hisšiʔaƛquuč, m̓ačiʔaƛatukquuč hisy̓akukʔi, hinaaḥinʔat. hiniip̓aɬ, huʔaasšiʔaƛ ƛuukʷaana. hayimḥat qʷicačiƛ̓i qʷayac̓iikʔi, hitaaqƛiƛ. hiniip̓at ḥaaw̓iɬaƛ̓i. čuu, waaʔaƛ ʔiičimʔi, wikʔaqƛ̓ick ʔiiqḥuk, wikʔaqƛ̓ick ʔiiqḥuk, qʷisʔanitiik n̓upqʔičḥ. |
| 30 |
ʔuucḥaʔaqƛ̓ick n̓upčiiɬ. haptsaap̓at ḥaaw̓iɬaƛ̓i, wik̓ap̓at. č̓itiityaqpiƛ ḥaaw̓iɬat̓i, qʷaaquu cubicɬequu, qʷaaʔiitq ʔaḥ hiiɬʔiitq waʔič. ʔanaʔis ʔaḥ kuḥ hiiniiʔasšiiɬ. ʔuušyuyaƛquuč ʔacšiƛ, kuukuḥʷ̓isaʔuqs ʔaƛaqs. ʔaḥ qʷaaʔap ʔaniic ƛ̓aaq, ʔuḥʔiiš ƛ̓qapt qʷiʔiic̓ap̓aniʔitq qʷayac̓iik. |
| 31 |
ʕuy̓aaƛ ƛah. čuu kʷiisqšiʔaƛ ƛuukʷaanaƛ. ʔiiqḥuk̓ʷaƛ hiiniicc̓iʔanit qʷayac̓iik, ʔucaʔap̓anit ḥuuɬ waaʔaƛ, ḥuu ḥacaqc̓usaƛ. ʔaḥʔaa ƛuukʷaanaƛquu ʔucaʔap̓anitwaʔiš waaʔat, ʔucaʔap̓anitwaʔiš čiiqƛisʔatḥ, ʔucaʔap̓anitwaʔiš mačɬiʔatḥ, nučaaɬʔatḥ waa, ḥaaɬ kʷisaqc̓uqʷis. |
| 32 |
ʔuḥukʔaɬ ƛawaamaan̓uuʔisʔatḥ, t̓uk̓ʷaaʔatḥ, yuuɬuʔiɬʔatḥ, waa huuʕiʔatḥ, ḥaa ʔuukʷiɬniš ƛawaa. qʷaaƛaa niitiinaʔatḥ. ʔaya ʔuuy̓aasḥhy̓ims. ḥaʔii niiyaa, ʔuuy̓aasḥy̓ims. yaaqʷiɬʔitq relatives waaʔat. Relation. ḥaʔii. |
| 33 |
ʔuusaaḥi qʷisckʷiiʔatʔitq. ʔuusaaḥi ɬuucsaamiiḥ ḥaatḥaakʷaaƛ ḥaw̓iɬ ʔunaakʔi. čapxnaakšiƛ ʔucačiƛ hiist̓iƛ ʔaḥ, ḥaw̓iɬʔi, ḥaakʷaaƛ. qʷaaƛaa ḥaaw̓iɬaƛ ɬučḥaa ʔucačiƛ ḥaw̓iɬʔi ḥakʷaƛnakʔi, ʔuustukḥ wikmaḥsap pawaɬšiƛ ʕimtii. |
| 34 |
Muu ḥaw̓iiḥ, hišuk muu. muu. čuu, qʷisckʷiiʔiš ʔaḥʔaa. wiiy̓imtwaʔiš wiiqḥap maan̓uuʔisʔatḥ qʷayac̓iik. wik, wik̓aƛquuč. ʔuušyuuyimts y̓uuqʷaa qʷiyuuyiis ḥaaw̓iɬaƛ, hat̓iisits. hiiniic yaqukʷitiis ʕiniiƛ, ʕiniiƛ Adanac ʔukɬaa. |
| 35 |
Hiʔiisʔaƛquu ḥaa, hat̓iis. ʔuyaasiɬa ʕiniiƛ̓i. ƛawaʔiiʔats ʔuʔii ʔaḥ, wiks ɬačiƛ tič̓iʔakqs. yaaɬ ʔaḥ tuxšiƛ. tuxcpaa kimy̓aqis suč̓as yuw̓as uxcpaa qʷayac̓iik. n̓aacsaats qʷayac̓iikʔi ʔuyaasiɬat p̓ap̓ii ʔaḥ qʷisʔat. haa, wikʔaqƛs suutiɬ wiiqḥap waaʔaƛ, wikʔaqƛs suutiɬ wiiqḥap. |
| 36 |
Qʷaaʔaƛs ʔaḥʔaa ḥan̓uuʔas. ƛuuɬƛuuɬa huʔacačiƛ tuxcpaa. xemc, xemc, xemc. ʕasʕasš, č̓aapaciiɬw̓it̓as. ḥumiis ʔun̓aaḥ hitaaqƛ̓iƛ. ḥumapt ƛuɬquu, čačimḥiquu. ʔuuwaʔat ḥumapt, yacp̓ičuʔat. hiistiʔat n̓an̓aan̓ič̓at, ʔustʔas takqiinuʔat, qʷiicaapiʔitq, ḥiinapi, ƛuɬquu. |
| 37 |
Taakšiʔat ciciqink̓at, ʔuʔukʷink̓at ḥaaɬapi ḥaw̓iɬʔi. ɬaakɬaak̓ʷat, wikp̓iʕatquu, wik̓atquu ʔuusuqtat, wik̓atquu ʕačuuʔat. ɬaakšiƛ, n̓aačiiɬa, čaamaapiqčik ʔuxšiƛ waa, qʷiʔiiʔasʔaqƛii ʔuw̓iiƛ. huu! hinʔay̓aqstup č̓iḥsuuqƛtisim hiy̓aqƛ suč̓asʔi, č̓iḥʷaḥsuɬmaḥsap suč̓asʔi |
| 38 |
Č̓iḥsuuqƛtisim ƛ̓iʔiikƛ̓ika hiistiƛ ʔucačiƛ kukʷiniksi. ʔaƛac̓asqi ƛ̓iḥuk ʕiyaaɬ t̓uḥc̓iti, hisiiʔas matwaḥsuɬ hiɬqiiʔi. č̓aapacmaʕukʔi, wik n̓ačmisinƛ ʔunw̓iiƛ qin č̓iḥʔaqƛ suč̓asʔi. ḥaḥuupač̓ak. k̓aḥšiƛ̓aaɬ ʔuuš ḥumiis ʔuw̓iiʔaƛquu, ʔuusayaʕas. |
| 39 |
Qʷaaqʷaaʔitq ʔuḥ ḥumiis ɬuucsaamiiḥ ɬatx̣ʷak. ʔaḥʔaaƛ ʔuw̓iiʔaƛquu, čimʔitap̓at. čimʔiiʔaƛquu ʔun̓aaḥʔat kač̓ak n̓upy̓aɬ. piḥšiʔat qʷaaʔasʔitq piḥaa eyeballing waaʔatquu. čitḥtaaʔap̓at čimʔas-aƛquu, waa, ʔuunaw̓it̓asʔitq. |
| 40 |
Taakšiʔat ʔunaakʔat c̓istuup m̓uksy̓u ʔuʔiḥta. t̓iʕaaʔat̓ap̓at hiišcutiɬʔat kačiʔat, ƛiisšiʔat, XXX ḥuuɬ qʷaaʔitq plumb. ʔaḥ qʷaaʔap̓at, waa, čimʔasʔaƛquu waa ʔuuḥʷ̓aɬʔat hiišiisač̓ak, qay̓aaxʷas huuʔak ʔuyi. ʔaḥʔaa qʷaaʔap̓atʔiš ʔaqʔištiik, č̓aapaciiɬʔaƛ̓atquu. |
| 41 |
ʔaayištaqapi č̓apac, p̓inw̓aɬ, ʔiiḥs p̓inw̓aɬ, waa ʔaḥʔaaʔaƛ ʔaqʔištiik, č̓apacsa waaʔat. qacc̓ap̓it ɬaaḥšiʔat ʔuḥʔiš ƛaʔuu waa yaaqʷiɬckʷiʔaaɬ, yašmaqac waa. waa ʔaḥʔaaʔaƛ ʔunaḥʔisʔi č̓apac k̓aakin, k̓aakin waaʔat. k̓aakinʔis. |
| 42 |
Waa huuʔak ʔuyi qiiʔaƛ, qiisasaƛ, qʷiyuyiič ʔuukʷiiɬ ƛ̓icuuɬ. č̓apac ʔiiḥs, ʕaʕaači, siič̓ak. ʔuč̓ak̓ʷaƛ qʷiyuyiič muuɬšiƛ. waa, ʔaḥʔaaʔaƛ ʕasʕasšiƛ̓asaƛitquu. ʕasʕasš waaʔat, ʕaasuk. č̓aaḥč̓aaḥa. waa ʔaḥkuu ƛaʔuu. histaqiisʔat hiɬyin ƛaaquup̓at. |
| 43 |
Čačimḥičiʔaƛquu ƛaaquuɬ, ʔuutaqšiʔaƛ kʷiscaqc̓uuʔi ƛičaaʔi ƛaaquup̓at. ʔuḥ piḥpiḥšiʔat, wik̓aaʔit cicikpaɬa. ƛiiḥcuutʔaaɬ, wik̓aƛquu čačamḥi sipuus. ƛiiḥcuutʔaaɬ ḥaaʔak. ʔaḥ čimcaqs ʔucaḥtakquu, waa qacaqs ʔucaḥtakquu. |
| 44 |
ʔaḥ qʷaaʔap̓at. waa č̓aḥšiʔat, č̓aḥšiʔat, hawiɬčaqšiʔaƛquu hiɬpiiʔi čačimḥiʔap̓at. ʔuḥ hawiɬčaqšiʔaƛquu, kʷistʔatap̓at. ʔuuḥʷ̓aɬʔat kimty̓ak qacc̓a, ʔaƛa, kʷatyiik y̓aaqs kimtšiʔat. ʔuḥʔaƛ ʔaḥ kʷatyiikʔi t̓iʕaaʔatu kʷistʔiiƛ. |
| 45 |
Waa ʔuutaqšiʔat hiy̓aḥs, č̓aḥšiʔat, hiskʷist̓aḥs. wikcukʔic̓aƛ ƛaḥ powersaw ʔuuḥʷ̓aɬʔaƛ čitšiʔat. čitšiƛ̓aaɬ ʔapw̓inqs hiistiƛ. ʔucačiƛ hiɬyin, ʔucačiƛ ƛičaa, qʷaaʔap̓at č̓aapaciiɬʔat. n̓upčiiɬšiƛmatak̓aƛ̓atʔaaɬ. waa hihisupiʔat hisaawuɬ. |
| 46 |
Qacaqs waaquuk čimcaqs. ʔuḥʔaaɬ ʔuušcuk, hiɬyinʔi. qʷaa y̓uuqʷaa ƛičaaʔi. hiɬst̓uuqs waaʔat. ḥuu hiɬyinʔakʔi č̓apac, c̓aaḥačiƛ̓aaɬ. titinʕinčiƛ. ʔucuk̓ʷaƛ̓aaɬ ʔaaʔaaʔišat puukʷay̓ap̓at. ʔaḥʔaaʔaƛ, hawiɬčaqšiʔaƛquu. wik̓aḥsiʔaƛquu. |
| 47 |
Suutšiʔaƛ qʷaaƛaa, qacc̓aquu, ʔapw̓inqs hiistiʔat. ʔunaak̓at kač̓ak. qʷit̓amaḥsakʔitk ʔuuktisʔat ʔunaḥʔitq č̓apac. hawiɬčaqšiʔaƛquu ʔustʕaḥsʔi. čamaqƛ̓aƛ. wik̓at ʔaašx̣ʔaašx̣at. ʔunaak̓at hupy̓ak. qʷaa ʔaḥʔaaƛ hiɬ ʔat̓aquu piḥpiḥšiʔat, hišcaqs. |
| 48 |
Piḥšiʔat. ƛ̓uɬšiʔat. n̓an̓ačpaɬʔatʔaaɬ ʔaqʔištiik, ʔat̓aʔaƛquu hišcaqsʔi. Curves, yaaqʷiɬcimʔatʔitq waaʔat ƛ̓ačii, ƛ̓ačii, waaʔat. waa ʔaḥkuu, cikimin waaʔat. č̓aḥy̓ak, hiišiisač̓ak. ʕakm̓aɬst̓uqsy̓ak. ʔuč̓ak hiɬyin. qʷaa y̓uuqʷaa ƛičaa. |
| 49 |
Čamaqƛ̓aƛ. ʔuʔumḥičiʔaƛquu qʷit̓a. ƛaam̓aqak waaʔat. ƛaam̓aqak. čuu, ƛaam̓aqšiʔaƛquu. taapiiɬsap̓at, taapiiɬsap̓at. čiiḥt̓asw̓it̓asʔap̓at. ʔuʔuʔiiḥʔat, ʔun̓aaḥʔat yaayaquwaʔaaḥi. muuquu. huuʔak̓at. huuʔak̓at ʔacšiʔat, huuʔakmaḥsat ʔaqʔištiik, waɬyaqpiʔat. |
| 50 |
ʔaya, č̓aapaciiɬʔaƛquu quuʔas sasakʷa, ʔuuʔuuqʷa. čiiḥt̓asʔap̓aƛquu (sasakʷa). čačimḥimaḥsap, wik ʔaašxʔaašx̣a. čiiḥt̓asʔap̓aƛquu č̓apac. ƛuuɬƛuuɬa. quuḥʷ̓aɬ c̓istuup. huuhumt̓asuk. ʔuušʔaaɬ, histaqšiƛ ḥuu sayačḥʔasʔi. |
| 51 |
Waa qʷisaa qʷaaʔap. weey hitacsuḥtaƛquu qʷisʔaƛƛa. wik. wik čiiʔukʷisʔap̓at. ʔun̓aaḥʔatquu hatkma qʷaaqḥʔaqƛii čačimḥii wikcukʔis hinačištuƛ hatkma, rollers waaʔatquu. čiičištup heey! maaƛšiʔat hininʔaƛ hiɬḥʷ̓it̓asʔitq ʔuuštaʕat |
| 52 |
Heey ʔuuš ʔaaʔaapḥi quuʔas ʔuuwaʔaƛquu č̓aapaciiɬ hupiiʔaq suutiɬ. heey čiiʔukʷis kiiɬʔiƛ wiḥaaʔitap. čuu ʔaḥʔaaʔaƛ ʔaqʔištiik waɬyaqpiʔaƛ haʔuk̓ʷap̓aƛ yaayaaquumtʔitq. čaanaat huuxsʔatu n̓upčiiɬ, ʔaƛčiiɬ. heey, čuu čamaasʔaƛ. |
| 53 |
Histaqiisʔaƛ. ḥuʕitap. ḥuʕas č̓apacʔi, ƛaam̓aqakʔi. p̓iḥšiʔat čimʔasʔap̓at, qʷaaqḥcimʔitq čačimḥi. n̓aacsaat. čuu kiḥcaasiʔi. ʔunw̓iiʔatʔišʔaaɬ k̓iccaasiʔat č̓apac. ʔin k̓icsaasiʔatʔaaɬ ɬuucsaamiiḥ. ʔuuwaʔaƛ̓atquu yaaqʷiɬʔatʔitq kʷinʔaɬʔat. |
| 54 |
Ḥaw̓iɬukʷit p̓aačiinaʔatḥ. waa, čuu, čimʔiiʔaƛquu ʔaḥʔaaʔaƛit č̓aḥšiʔatƛa. hawiɬčaqšiʔaƛquu hupšiʔat. huuphuupat. kačuuʔaaɬ hiɬyin, y̓uuqʷaa. ƛičaa. wiiksinḥap̓at ʔaqʔištiik cikcikmis. weey kʷistʔitap̓at. ʔaḥʔaaƛ č̓aḥšiʔatƛa ḥuʕaas. |
| 55 |
Hiišiisač̓ak ʔuupi yuušink qʷaaʔitq ʔaqʔištiik, qay̓aaxʷas, ʔin k̓atyiikʔis ʔaḥ qay̓aaxʷas ʔaniiyač̓ak ḥuuɬ. hiiyiqšaḥapckʷiʔaɬ quuʔas. qaaqaay̓uxʷa, ƛ̓ikuuɬ waaʔat. ʔuušckʷiiʔaaɬ ƛ̓ikuuɬ waaʔat. ʕac̓ik ʔuuš quuʔas. haa qʷaaʔišʔaaɬ yaquusi čamiḥta quuʔas. |
| 56 |
Hišuk wikcukʔis, č̓itkʔis waa. č̓itkʔisʔiš waaʔaƛquu n̓uw̓iiqsakitqs. č̓aapaciiɬʔaƛquu, ɬuucmamatakʔiš waaʔaƛquu, ʔaani ɬatx̣ʷak qʷaa.ʔ čuu. hawiɬčaqšiʔaƛquu, č̓aamic̓inup̓at. qʷaqʷaaʔat ʔappii, curve čačimḥap̓at. Well hawiɬčaqšiƛ. |
| 57 |
ʔuukʷiɬʔat taapʔim. saač̓inik̓at tapʕaqšiʔat one, c̓awaak, ʔaƛa, qacc̓a, waa muuquu. taapʔim. ʔuuktisʔat ʔunaḥʔitq. ʔunaaʕači. ʔaƛakʷaɬukʷitʔiš, ḥaa ʔaƛakʷaɬ taataapʔim. qaƛakʷaɬ. ʔiiḥs č̓apac. ʔiiḥs č̓apac. waa huʔaas ʔaƛpup̓ititqač̓a č̓aapšiƛ, ʔin t̓aatn̓aʔis ʔuḥ ʔayamaḥsa ʔaḥ qʷaaʔiiš. |
| 58 |
Č̓aapaciiɬʔat hawiɬčaqy̓ak tapʕaqšiƛ. tapʕaqšiƛ waa hawiɬčaqšiʔaƛquu tapʕaqšiƛ. ʔukʷiiɬʔaƛ̓at ƛaamaksim ƛaamaksunup̓at. ʔutwiiquu ʔutwiiʔapquuk ƛaamaksim ʔuutaq. cicikpaɬšiƛwaʔišʔaaɬ wawaamitʔišʔaaɬ. cicikpaɬšiƛ waa hišcaqs. |
| 59 |
ƛ̓aaƛaay̓ixʷapuƛs. kʷaʔaɬʔaƛquu. kʷaʔaɬʔaƛquu ʔuʔaɬaʔap̓aƛ̓atquu kʷama, prow, ḥuu hiɬyinʔi, kʷama ʔuʔaɬaʔap̓aƛ̓atquu ʔunaak̓at ʔaqʔištiik, tumiis. č̓aʔak tastaasšʔat. heey miɬaasip̓at. hisšiʔatna ʔuuktisʔaƛ̓at ḥaaɬ qum̓aaʔitq tuƛtupkas. |
| 60 |
Heey č̓aḥšiʔat, č̓aḥšiʔat, hišcaqs. heey huʔaasʔatƛa. haa čačimḥičiʔaƛquu. hee k̓icaaʔisquu waaʔat. waa čuu, tasšiƛ ʔiškʷiic. perfect, perfection. čačimḥi. waa, hinaɬaʔap̓at. suutšiʔat c̓awaak ḥuuɬ hiɬyin. waa qʷisʔat hišcaqs. |
| 61 |
Suutšiʔat. waa qʷaaƛaa ḥaa hiɬsp̓iiʔi suutšiƛ. ḥumiis ʔunaak̓at. Dowel waa mamaɬn̓i. ʔaḥʔaaʔaƛ ʔaqʔištiik. ʔuuqstup̓at, ʔuuḥʷ̓aɬ ʔin mamaɬn̓i ƛuuʔakʔi. qʷiyuqʷin č̓aapaciiɬ ʔuuḥʷ̓aɬckʷi ʔišc̓iip huuʔak. waa ƛ̓aaqƛw̓it̓asʔi sitsaap̓at. |
| 62 |
ʔaʔam̓iḥtaʔi. qʷaaƛaa hiɬsp̓iiʔi, qʷaaʔap̓at ʔaḥʔaa. waa ƛičaaʔi, kʷamaakʔi, ƛicaa y̓uuqʷaaʔap̓atƛa tumiis ʔuuḥʷ̓aɬʔat. tumisšiʔat weey. tuutuumisa. č̓aḥšiʔat č̓aḥšiʔat, qiičiʔatʔiš. hinasmatakʔiš n̓upčiiɬ, ʔaƛčiiɬ ʔunicšiʔat. |
| 63 |
Čamaqƛ̓aƛ wik̓at ʔaaʔaaʔišat. wik̓at ʔaaʔaaʔišat. (ƛuuɬƛuuɬaʔi.) wik̓ii ʔaaʔaaʔiša. wik̓ii ʔaaʔaaʔiša. heey č̓aaḥč̓aaḥšiƛ. hinaɬačiʔaƛquu, hee hawiɬčaqšiƛ. ƛ̓aaƛ̓aay̓ixʷapuƛs qʷaaʔap̓aʔitq. kʷama hinaɬaʔap̓at. c̓ic̓iqink̓at. |
| 64 |
C̓ic̓iqink̓at čačimḥiʔaqƛ qʷaa. wik̓at, wiiy̓aanitwaʔiš ʔun̓aaḥʔat suč̓as ʔuw̓asʔi. numaak. ʔuḥtinʔakquuk č̓apac ʔuw̓asckʷiʔi. waa ʔacyuuquuk yaašmaɬ qʷaaʔapckʷiʔitqʔaaɬ huuʔak wiiqʷiiqy̓aanuʔatwaʔišʔaaɬ. ʔayimt wiksaaʔa. |
| 65 |
Numaak, ʔuḥtinʔap̓at č̓apac ʔuw̓asckʷiʔi. ʔaḥʔaa qʷaaʔiiš (ḥaaḥuupač̓ak). č̓aapaciiɬʔat wik̓at ʔinštisʔat. n̓ačp̓ičuʔat saač̓ink̓at. n̓ačp̓ičuʔat hawiɬčaqšiʔaƛquu qʷaaʔapckʷiʔat huuʔak qiiʔaƛ. heey haʔuk̓ʷap, haʔuk̓ʷap. ʔunaak hiɬtqiiʔi, sipuus waaʔat. |
| 66 |
Hiɬyin sipuus ʔunaak, qʷaaƛaa ƛičaa ʔaaḥʔasa qʷaaquu keel, keelquu. čamaqƛcuk y̓uuqʷaa. hawiɬčaqšiʔaƛquu č̓aḥšiʔat čamaasap̓at. cikʷasquu hiy̓akƛiqsʔi cikcuut waaʔat. ʔaḥʔaa qʷaaʔiiš č̓aapaciiɬʔat. čuu ʔuukʷiɬs wiik̓aɬuk. |
| 67 |
Hawiɬčaqšiʔaƛquu ʕiiqšiƛckʷiʔišʔaaɬ quuʔas čamaqƛ. ʕiiqaa ḥuu hiist̓iƛ hiɬyin ƛičaa ʕiiqšiƛ. weey yaxšiƛ. wik ʔinštis yaaxyaaxʷa ʔucaḥtak̓ap, ƛičaa. yaaxyaaxʷa ʔucaḥtak̓apquuk hiɬyinʔi. šaaxtaswaʔišʔaaɬ. ʔunwiiʔaƛ̓iš č̓apac ʕiiqšiʔat ʔin c̓aaḥačiƛ ḥumiisʔi. |
| 68 |
Wik̓at qiiʔap̓at. piḥaaʔat huḥtak̓at. hee, huƛhaacač̓at heey huuʔap̓inqsak̓at haa, ƛičaa ʔucačiʔat. ʔaḥ qʷaaʔiiš č̓aapaciiɬʔat. ƛaḥʔaƛ mamaɬn̓i ʔuuḥʷ̓aɬʔaƛ̓aaɬ sandpaper. ʔuuḥʷ̓aɬckʷiʔaaɬ quuʔas yačaa. qʷaaqʷaaʔitq tin̓uukquu rough waa mamaɬn̓i. |
| 69 |
Sačkaɬ. ʔuuḥʷ̓aɬckʷiʔaaɬ tasmaɬit̓ap č̓apacʔi. ʔaḥ qʷaackʷiiʔiš quuʔas huuʔak. ʔuuḥʷ̓aɬckʷi yačaa, tukʷaʔatʔi yačaa. qʷaaqʷaaʔitq sandpaper. ʔuuš ʔaqʔištiik sačkaɬ ʔuuš hiiʔuɬa. čamaqƛckʷi quuʔas. wik ʔinštis. čuu. qiiʔaƛ, huuʔak, qiisasa. |
| 70 |
Qawiqaaɬ ʔukɬaa ḥaaw̓iɬaƛ. qawiqaaɬmitquu, qʷiyimtii qʷis. ʔaḥ histaqšiƛ nism̓aʔi. nism̓aakqin. ʔuḥʔat ʔuuʔaɬuk̓ʷat ʔumʔiiqsakitquu. wiipap̓at n̓uw̓iiqsimtquu, t̓an̓aakʔi. wiipap. hač̓a ƛaʔuucḥimt. ʔacšiʔathɬquuč čaakupiiḥ. |
| 71 |
ʔacyuu, kʷiikʷiisaḥi. ʔuqsʔaƛquuč kuukuḥʷ̓isa. wiik̓iiʔaƛ̓atquuč qawiqaaɬ. ʔatquu čamiḥta quuʔas qawiqaaɬ. histaqšiƛ ḥuu hiɬinʕatu. hiɬinʕatu waanaʔaaɬ ḥuu ʔuuc̓iqʷaʔi, hačɬiiƛspa. ʔacyuu. ʔuušyuuyaƛquuč y̓uuqʷaa ʔacšiƛ, qawiqaaɬ. |
| 72 |
ʔuqsʔaƛquuč ʔaɬčac, naaḥt̓ač, ʔaama, ʔaɬčac. ʔuušyuuyaƛquuč ʔuqs k̓aasč̓a, ʔučknaḥʔisʔi, kuukuḥʷ̓isa, k̓aasč̓a. ʔaanuuʔaƛquuč haʔuk ʔumʔiiqsak. ʔiiḥʔat kʷiisḥii, y̓uuqʷaƛa ƛaʔuktaʕasʔi. qʷaaqḥʔanitii qʷaaʔat. ʔaḥʔaaƛa ḥaaḥuupač̓ak. |
| 73 |
Wik̓at. wik̓at kaapap̓at c̓aawačiƛ̓at. čuu waaʔaƛ, qawiqaaɬ, ʔumʔiiqsak, naʔaataḥʔisim. ʔuyiiʔaqsiš, wikpiƛ hinaɬačiʔaƛquu. ʔamaɬačiʔaƛquu hupaɬ. naʔaataḥ ʔumʔiiqsuʔi. naʔaataḥ. huḥtak ʔin hiitkin. ʔuušw̓inʔat ɬim̓aqsti, qawiqaaɬ. |
| 74 |
ʔaya ḥaaw̓iiḥaƛ. wik̓atƛa kaapap̓at. ʔin ʔuušyuuyaqḥʔatquuč ciqšiʔat. wikiɬḥ kaƛḥšiƛ qawiqaaɬ. wikiɬ. ʔucačiƛ ḥuu hiɬʔiitqʔaaɬ, tukuuk. yaaɬwaaʔiš ʔaḥ tukuuk, hiɬačišt. c̓axšiƛ. c̓axšiƛ, qawiqaaɬ. qaḥšiƛuk. nay̓iik ƛ̓axšiƛ ƛuuɬƛuuɬa. |
| 75 |
Čiikʷituƛ tukʷaqʔi. m̓uč̓ičuƛ. m̓uč̓ičuʔat hiy̓aa ʔaḥʔaaɬ. hiḥak qʷaa, ʔuut̓iʔiɬaƛ qʷaaʔiitqʔaaɬ, tukuuk, hiḥak. RRRRR qʷayaatuk y̓uuqʷaaʔaƛquuč. yaayaaɬʔaƛquuč ʔaḥ tukuuk. n̓aacsaat. kʷiisḥii. kʷiisḥii. ƛ̓iniiḥakʷaʔinš quuʔas. |
| 76 |
ƛ̓iniiḥak. hiy̓aaʔaƛquuč, qum̓aa kaƛḥšiƛ. Reey. č̓uuyukʷiƛ. hiiniiʔatu. č̓uyaa, tukuuk. wik ʔiqsaacu. Raa. ʔuunicḥn̓akitii, hiḥʔiƛ. Raa. ƛaʔuu hiḥʔuƛ. hicnup. ʔaa, ʔanaqsiš ʔaḥ waaʔaƛ. qʷiqukʷitii ʕiičnuu. wiʔii nasaƛitsiš ʔaqiʔištiik ḥacxʷinƛ̓aqƛ. |
| 77 |
Hiiniiʔataƛ, tukuukʔi ʔaƛa. hiiniiʔataƛ y̓uuqʷaa. t̓apsčiƛ. ʔuuwaƛƛa, qawiqaaɬ ʔaqƛ̓i m̓uksy̓i. watqšiƛ ʔaƛimt qʷiqitii qum̓aamitii. k̓uuʔuɬšiƛ ḥuu ḥačxʷinƛ, t̓apsčiƛ. hiḥʔuʔaƛquuč tukuuk. hiisaqḥɬaƛquuč ḥuu hiɬmuutsa waa, sayaaʔi. |
| 78 |
ʔucpaaʔi hiɬitii kʷaac̓inuu waa ʔuuš ḥiɬ. ƛaʔuukʷiʔatḥspa hitaqƛis hiɬits ʔaḥʔaa. qiiyuuk̓ʷaaɬ. ʔanaqsʔaƛquučʔaɬ. wikʔii ḥačxtuup. kʷiisḥii ʔaḥ qawiqaaɬ, ʔuy̓iiḥaƛ ʔin m̓uksy̓iqc̓aƛ. (t̓iqs). hey, ƛayuukʷiƛ. watqšiʔaƛƛa, ʔaƛakʷaɬšiƛ. |
| 79 |
Ḥačxʷinƛ ḥuu, hiiniiʔatu. qawiqaaɬ. ʔuuy̓ip p̓uuʔi, suuḥaa, hey hitasaƛ. naʔiičiƛ ciiqciiqa. čuu qʷiisaaḥiyiik. ʔin kʷistuupsuuk, waaʔaƛ̓at. wiksuuk, wik. wik. kʷiisaaḥii waa. kʷistuup kʷistuupsuuk qʷaaqin niiw̓a. haa nasaƛna ḥačxʷinƛ̓aqƛ. |
| 80 |
Raa wikcukʔisʔiš waa. m̓uksy̓i ʔun̓aaḥcuu, waa t̓apsčiƛ nay̓iik t̓apsčiƛ tukuuk ḥačxʷinƛ. hiy̓aaʔaƛquučʔaɬ ʔiic̓iiqḥa. čuu, č̓uuyukʷiƛ̓aqƛ̓atniš waaʔaƛ. ʔucaḥtačiʔaƛ, tuč̓acsiʔiɬ. ʔaa, sayaʔii ʔuuwaƛ ʔuuʔuuquk nism̓a. ʔunicitii, huʔacačiƛ. |
| 81 |
Čuu, ʔucačiƛ̓aqƛniš ḥuu. hiɬinʕatu waaʔaƛ. huḥtak. naʔaa wawaaʔitq. naʔiičiʔaƛ. wikiičiʔaƛ̓at č̓uuy̓iiḥat. ʔin č̓uuy̓iiḥanit ʔaʔum. Raa č̓uuyukʷiƛ, sayaʔii ḥuu. ʔuuy̓ip̓aƛquu čaa, p̓uuʔi, tuškuuḥ. tuškuuḥ ʔaya. qʷaa, qʷaaqin haʔuk, wiḥiʔuʔaƛquu. |
| 82 |
Čuu. qiiyuuk̓ʷaaɬ, hišcačiƛ ḥuuɬ, sayaaʔi. ʔaʔiiḥ nuučyuu qacqasaƛquuč, ʔuušyuuya. t̓imyis. ḥunqis. ḥunqis waanišʔaaɬ. waɬšiƛ̓aqƛ̓ick waaʔaƛ̓at huḥtak̓at ʔin quuʔas. histaqšiƛ, wiḥaasʔatḥ. wiḥaasʔatḥ waaʔatwaʔinš. ququʔactup waaʔat. |
| 83 |
ʔana čims quququʔactup waa. quʔactup waaƛaa. waɬšiƛ. wiiqsii. ʔuupap̓aƛquuč qawiqaaɬ, ḥačxʷiiqčikquu. y̓aaqnaq. y̓aaqnaq qawiqaaɬ. y̓aaqnaq. čimt̓a. čimt̓a. ʔuukʷiiqstaƛquuč kakaw̓in. č̓iiʕaqaƛquučʔaɬ, ʔimč̓aaqy̓akukʔaɬ. ʔimč̓aaqy̓ak ʔuʔukʷink kakaw̓in. |
| 84 |
Čuu, waɬsaap̓at. wiḥiʔuƛ hiḥ. ḥan̓aḥtuʔaƛ̓i, ḥaa, yaqʔičʔitk waaʔaƛ̓at. ḥan̓aḥtup̓at qawiqaaɬ. hiy̓aaʔaʔim ʔaḥkuu waaʔat. ʔintšiʔaƛ̓iš ʔumʔi. ʔintšiʔaƛ̓iš ʔumʔi ʔacyuuʔiš. Raa yaaɬwaaʔiš ʔumʔiiqsuʔi, ḥamipšiʔat. kʷiisḥiiʔaƛ qawiqaaɬ, čamiḥtaƛ quʔiičiƛ. |
| 85 |
ƛ̓iƛkak. ƛ̓iƛkak. wikʔaqƛ̓ick ʔiiqḥuk hiɬitiik waaʔaƛ. wikʔaqƛ̓ick ʔiiqḥuk. ʔayaʔaqƛ̓atʔick ʔaʔataɬʔat. Raa yaaɬwaaʔiš ʔaḥ. kuukuḥʷ̓isa cisinsʔiiʔat. hisšiƛ. waa ƛaʔuu. waɬšiƛ̓aɬ qawiqaaɬ, ƛiḥsaƛ̓aɬ. č̓iiqƛis ʔuʔiiyis. č̓iiqƛis. |
| 86 |
Č̓iiqƛisʔatḥ. k̓ʷiny̓uqʷis ʔukɬaa. hitasaƛ̓ʔaƛ, hitinqsaƛ, haa, ʔuḥʔiiš qawiqaaɬ. ʔuḥmoo, ʔuqsʔismoo waaʔaƛ̓atƛa. ʔuqsʔismoo. ʔaaḥʔasa suukʷinkḥatquu. ʔuqsʔisʔiš waaʔat. ʔaniyat waaʔat, ʔisʔiš, wukʷink. wiḥisan̓ap ʔumʔiiqsuʔi, kuukuḥʷ̓isa. |
| 87 |
ʔayaqsƛa tuškuuḥ. ʕac̓ikƛa tutušk̓iiḥ qawiqaaɬ. ʔuʔinɬ kuukuḥʷ̓isa qawiqaaɬ. wiik̓iƛ n̓uw̓iiqsak. wiik̓iƛ. waasaƛḥa waaʔat. n̓uw̓iiqsuʔi wikiɬ. qʷaaʔap ʔaḥʔaa, kʷiisqšiƛ. waa, muuqʔičḥšiʔaƛ hinat̓aƛ, n̓uw̓iiqsak. čuu, ʔiiqḥuk̓ʷaƛ qʷisitʔitq, ʔacyuuʔaqƛniš waaʔaƛ. |
| 88 |
ʔacyuuʔaqƛniš. naʔuuqsʔaqƛ̓ick siičiɬ. wiiqḥapw̓it̓asʔaaš qawiqaaɬ. ḥaʔukʷiƛ̓asʔaƛ. c̓axšiƛwaʔiš qawiqaaɬ, tukuuk ʔuḥtaa ʔiiḥʔii. c̓axšiƛ. sukʷiƛ. ḥaa ʕaḥmisʔi, qaaḥiitaʔi. wik. wik̓at k̓ʷačšiƛ. t̓apsčiƛ ḥuu waa hiiniiʔatu ḥaaɬ, c̓aʔiiʔaʔi, č̓aniičiʔat. |
| 89 |
Qʷisƛaa nuučyuuʔi č̓aniičiƛ. čuu waaʔaƛ. ɬačiʔi waaʔaƛ n̓uw̓iiqsuʔi. wik. wik. čuu waaʔaƛ. ɬaqʷayat k̓acḥaaɬ, tukʷaqʔinʔi, m̓uč̓ičup̓at qawiqaaɬ. čuu waaʔaƛ n̓uw̓iiqsuʔi. qʷisʔaƛ̓im qʷisʔaqƛiik t̓aapsʔatu qawiqaaɬ, tukuuk ʔukʷink. |
| 90 |
Tačiƛ quuʔasʔi. tamaɬn̓i. wikn̓ii, c̓awin qawiqaaɬ. ʔaaʔiiktaqšiʔaƛwaʔiš n̓uw̓iiqsumitquu tasaƛ. ƛ̓aaʔas. waa ʔukɬaaʔakʔišʔaɬ, ƛ̓aaʔas, čiiqƛisʔatḥ. hiɬʔaƛukʷiiʔaɬ boundary. ƛ̓aaʔas waaʔat. tasaƛ. huḥtak̓aƛƛa qawiqaaɬ, ʔin hitasaƛuk n̓uw̓iiqsu. |
| 91 |
Kuukuḥʷ̓isa ʔuʔuʔiiḥʔaƛ. ʔucačiʔaƛ ʕaʕiƛquu, ʔam̓aqƛ̓iḥtaʔi. tasaƛ. waɬšiʔaƛ̓iš. hiinaƛ, n̓uw̓iiq, n̓uw̓iiq waaʔaƛ. n̓uw̓iiq waa. naʔukšiƛ quum̓iiʔanitii. čuu qʷisitiik qawiqaaɬ, waaʔaƛ̓at, qʷisitiik. qʷisitiik. haa, ʔuunawaʔiš qaḥšiƛ. |
| 92 |
Haa, waa. ḥaaḥuupač̓ak, wik̓at, ʔuuʔuušiɬʔat kaapap̓at, ʔin, ḥaaḥuupa wiksuuk, c̓aawačiɬ kaapap. waa ʔaḥ ciqy̓ak. ʔuyaaƛitwaʔiš qiiʔaƛ̓itq, ʔiiqḥukʔaƛ qawiqaaɬ hiɬitʔitq, qʷiʔiimitʔitq. č̓up̓uuqsʔiš quuʔas, waaʔaƛ. ʔuuktisʔaƛquuč mux̣ʷ, qʷišaaʔeeƛ. |
| 93 |
Sayaaʔee. qʷaawaaʔiš y̓uuqʷaa maaʔak, č̓uuy̓iiḥatwaʔinš. ʔuuʔuuquk, ʔuuʔuuʔuqukʷis, wawaamitʔišʔaaɬ yaqukʷitiis n̓uw̓iiqsu. ʔuuʔuuʔuqukʷis ḥuuɬ. ʔucpaaʔi, yaaqʷiɬʔitq mamaɬn̓i south waa, ʔucačiƛckʷi ʔaḥʔaa qawiqaaɬ, south, waa, hačɬatuqʷak, westerly. |
| 94 |
Hiɬ ʔuukʷiiqstackʷi, k̓iɬanus. k̓iɬanus. tukuuk. ʔaya tukuuk. hiiy̓aaqsḥhin ʔuuš tupkaapiiḥ ʔuuš ƛ̓isit. waa ʔaḥʔaaʔaƛ, maaʔak, qukʷičink č̓uyaa. k̓ʷak̓ʷaƛ. k̓ʷak̓ʷaƛ hiɬ. t̓imyis ḥacxʷiiʔi. ʔuuš ʔuuš ḥacxʷii. ʔaniyaƛquuč wiiqsiiʔaƛquu wiḥiʔuƛ̓aɬ. |
| 95 |
ʔun̓aaḥ hiɬʔaaḥi ʔuuqči, y̓uuqʷaa ʔun̓aaḥ, hiɬuusii ʔuuqči. qʷaaniiš, qʷaaʔiiš qʷaaʔiitq tukuuk qʷaaqin, naʔaaʔiš. naʔaaʔatniš ciiqciiqa. naʔaawaʔiš, niiḥiɬ. ʔaḥʔaa qʷisitwaʔiš qawiqaaɬ. histaqšiƛckʷi, čiiqƛisʔatḥ, qawiqaaɬ, ʕimtiiʔak, ʕimtiiʔak, qawiqaaɬmitquu. |
| 96 |
Čuu, ʔuunaʔiš ʔaḥʔaa. qiiʔaƛ, huuʔak, qiisasa. hixy̓aaʔic̓aƛwaʔiš, č̓aaxstimcm̓it. č̓aaxstimcm̓it waaʔat, himwic̓aƛ̓atquu. n̓ačpʔaaʔa ḥuu kʷisaqsʔi. n̓aacsaat quuʔas, ʔiʔiinis, ʔiʔiinis. ƛ̓upaaʔaƛ, ƛ̓up̓iičḥiyimtquu, ƛ̓up̓iičḥiyimtquu hat̓inʕaqa ɬuucsaamiiḥ. |
| 97 |
Ḥacqaɬitwaʔiš č̓aastimcm̓it, ḥacqaɬ n̓aacsa ḥuuɬ sayaʔiip, ḥamat̓ap hiišiɬ. hixy̓aaʔaʔiswaʔiš ʔaḥ, qʷaxʔaamitii. qʷaʔaamitii qʷaa ʔaḥ. heey qʷisʔaƛquuč ʔaḥ heey, ʔuʔumḥimataks kʷixsaqsiƛ waaʔaƛ. c̓aanititwaʔiš ʔaḥ qʷaasasa, c̓aanit, huʔap̓in c̓aa, c̓aa. |
| 98 |
Čuu, hitapʔiɬ č̓aaxstimcm̓it, wik ʔuucḥa, saaxyapanačšiƛ̓aqƛquu. ʔin hišsaacu č̓aastimc. ʕac̓ik haptšiƛ, hitaqƛ̓uƛ. heey hitapʔiɬ. ʔuuwaƛ č̓an̓iiʔat quuʔas n̓aacsa, č̓an̓iiʔat č̓aastimcm̓it. wik̓at huḥtak̓at ʔuḥquu. ʔaanačiɬʔat n̓aacsat quuʔas, quʔactup. |
| 99 |
Waa ʔaatḥšiƛ. qum̓aačiɬitii. ʔuxʔukʷačinks ciiqciiqa waaʔaƛ. ʔuxʔukʷačink ʔaḥ. c̓awaak. yaaxcšiƛ̓ic̓aqƛs waaʔaƛ. yaaxcšiƛ. yaacšiƛ ʔuncukʷisitii ʔuuʔuuquk, miiɬuuk. tuupšiƛ. naʔiičiƛ txtxtxtxtxtx qʷayaatukʔat. txtxtxtxtxtx qʷiqiiwaʔin waaʔaƛ ƛimkšiƛ kuʔaɬ č̓aastimc, qʷisitiiʔaaɬ tax̣šiƛitquu. |
| 100 |
Yaaxcšiƛ. wik. wiiy̓imtwaʔiš yaacuk qʷaaqin quuʔas. qʷaaʔap ʔaḥʔaa muukmuukʷa. ʔuuxʔiiyaqsi c̓aʔakʔi n̓aacsii, txtxtxtxtx. txtxtxtxtx. t̓aapsʔatu č̓aastimcm̓it. hinusa m̓aaqsuuɬ hisit. qʷaaʔap t̓aapst̓aapsa ʔayiičiƛuk ʔuʔiiʔasʔap ḥaa. |
| 101 |
Kuučiɬšiƛ. ʔaya, kinaaḥckʷi ḥaaɬ hitinqisʔi, m̓uukʷaquk. sačkaʔap, č̓ičiƛ, qum̓aakitii. heey maaḥt̓iqiiɬ k̓uč čaškak, maḥt̓iičiƛuk, saač̓utcqiiʔisukʷitquu. ʔinixkʷiiɬšiƛ̓is č̓aasta, ƛ̓uuyiipiƛ. heey, ʔun̓aaḥšiƛ qʷicsapaaḥi ʔinkʔii. |
| 102 |
Hatksaap ʔunukʷititii maƛaak maƛaak, t̓aʔak ʔuušyuuyaʔat waaʔat, hatksaap. ḥaaxʔakʔis. ʔučknaḥʔis č̓aastimcm̓it, k̓ʷitxak ʔuʔinkʷitʔis ʔaḥ qaaty̓apt̓aʔi. ʔuušyuuya, c̓išp̓uuqsmip̓itʔatquu ʔin c̓awaaqƛ̓as hm! waaʔaƛquuč, hm! |
| 103 |
Quxʔac̓atḥqač̓a, waaʔaƛ ƛ̓uuyiipiƛ. ƛimkšiƛwaʔiš ʔuuyuʔaaɬšiƛwaʔiš quuʔas ḥaaɬ ʔiiḥ sukʷiʔatuk yuuɬʔaƛ̓aƛ. kuʔiičiƛ hiʔiiswaʔiš yacckʷii, čims. wim̓aaqƛ ʔuʔukʷink̓at čims, ʔin wiiʔak. wim̓aaqƛ č̓iiʕaqa. ʔuʔuʔiiḥšiƛ hisit t̓apsšiʔaƛquuč m̓aaqsuuɬ. |
| 104 |
Hininwaʔiš qʷayaac̓ikm̓it, naʔaa maasuuɬšiƛ, woo=. ḥaa y̓uuxqʷaaquuʔis, xuxuuu, qʷiiʕaƛ. wik, wic̓ik. heey, hinin qʷayac̓iik. c̓iiḥati ʔukʷiiɬ muustati. y̓imqƛ č̓aastimcm̓it, qʷayaac̓ikm̓it. y̓imqƛ. ʔuy̓iiḥa ʔin ʔaʔiiḥʔat čičiči. |
| 105 |
Wik. wik čamiḥta haʔuk, ʔašx̣tuup t̓aačt̓aača, x̣ax̣ x̣ax̣ x̣ax̣. ʔaʔiiḥʔat čičiči. waʔičuʔi waaʔaƛ huḥtak č̓aasta ʔin waxʔičiƛw̓it̓as qʷaxyaac̓ikm̓it. sukʷiƛ muustatakʔi. qʷiʔiimitii ʔaḥ qacuut, k̓ʷačšiƛ tiičma. ʔanat̓uuʔas kiikiisḥhi, qaḥšiƛ. |
| 106 |
ʔin ʔiiḥ qʷayaac̓ikm̓it, ʔiiḥ. ʔin ʔana ʔiiḥ t̓uḥc̓iti. qatqʔatap, c̓uy̓itap. haptsaap, hiʔiis, hiʔiisʔitq waʔič̓as, hiiɬc̓apuɬa. hiɬʔaƛ ʔaḥ qʷayaac̓ikm̓it qaḥak̓ʷas. wik qiiḥsn̓aak ʔunačiɬ, muučiiɬ. ʔiqsiɬaƛƛa, hwooowa, maasuuɬšiƛ, muup̓itʕaƛ, xuxuuwuwu xuu, waaʔaƛquuč. |
| 107 |
Sixy̓aaqseeš č̓aaxstimcm̓iit qaxḥsaamiits qʷaxyaac̓ikm̓iit, wawaa. wik tuuḥuk, ʔin c̓awaak. ḥeey, y̓akšiƛ qʷayac̓iik, ḥayu, ḥayučink. ḥeey maasuuɬšiʔaƛ, ḥaw̓iɬimmatak, woo=, maasuuɬšiʔaƛ. wik̓iititwaʔiš n̓uučyu, wik̓iit. |
| 108 |
ʔunaak sačk̓aḥs, č̓aastimcm̓it. saxčkšiƛ̓ixc̓aƛquuč ƛuyačiƛ n̓aačʔatu ʔuuktis ḥaaɬ puuɬʔii, c̓aʔak. n̓aaxčʔatuʔis, ḥeey, saaxčksaačkaʔis. wiiy̓a ƛ̓uutx̣ik qʷaaʔap ʔaḥʔaa wiwiikʔay̓aqstupmaḥsa. čuu, ciqšiʔaƛ ḥaw̓iɬʔi. qaḥsaamitʔick qʷayaac̓ikm̓it, waaʔaƛ. |
| 109 |
T̓iʕas hiʔiis ḥaaɬ, ʔatquu hiiɬc̓apuɬa ḥaa qʷayaac̓ikm̓itckʷi. tačyuuʔaƛ qaḥak haa m̓ay̓ukšiʔat. qaḥsaapʔaqniš suutiɬ, waaʔat. haptsaap ʔaqʔištiik, haptaaʔak ḥaa muustatakʔi. hitaatuʕiḥtap šaʔiḥtimʔi, yaaqḥʷ̓aɬʔitq qaḥsaap, qʷayaac̓ikm̓it. |
| 110 |
Sweating. qʷisʔaƛquuč ʔaḥ kiššiƛ. c̓aʔatu ḥaaɬ ƛ̓upmis. kuḥšiƛ. kuḥsaap̓ič, waaʔaƛ. qiʔiiʔič qiḥtačiʔič waaʔaƛ. heey ʕiitaʕiitaʔick, waaʔaƛ̓at. ʔaa, y̓uuqʷaaʔap̓i ʔaḥ ʔucaqc̓uʔi waaʔaƛ, qʷicpaaʔitq c̓aʔakʔi, c̓aa ʔaḥ ʔaya hisit. |
| 111 |
ʔunw̓iiƛ yaaqƛ qʷayaac̓ikm̓it ʔin ʔaniic̓ap̓at t̓uḥc̓iti, ʔaniic̓ap̓atukʔaaɬ ʕawatk ʔuʔiic. qʷaa haʔuk, qʷayac̓iik. wiiy̓a humaqƛ̓ic. čuu, waaʔaƛ. nuuxʔit̓aqsiš, waaʔaƛ. ʔunaak nuuk waaʔaƛ haa. ḥaw̓iɬisimʔi, ƛ̓isimɬ. huuxɬšiʔaƛ heey ʔuušp̓aɬšiƛ qʷayac̓iik ƛawaʔiiʔaƛquuč kʷaačiƛ. |
| 112 |
Hiʔiis ḥaaɬ qʷayaac̓ikm̓it. kuḥyuuʔaƛ. hisiikʔaqƛ̓itq kamatqšiƛ, wiik̓iƛ tiičmis, wikst̓iiḥʷ̓it̓as kamatquk ʔaʔaanisapi c̓aʔakʔi. qxxxx, k̓ʷačšiƛ ʔaḥ. kaxmatqšiƛ q̓ʷaaxtii ʔayaak ʕimtii, q̓ʷaaxtii kamatquk č̓uq ʔuqɬaap̓aƛ qʷayac̓iik, takaatisʔaqƛq. |
| 113 |
ʔuusḥhtin č̓aastimc. suxsaa hisiikʷasu pxʷuw, putqʷaakƛaƛquuč. putqʷaakƛi qʷaa. waw̓ik č̓aastimcm̓it. xaw kapxšiʔat ʔaḥ hinusaʔic̓aƛ ḥuu kʷisaqsʔi. ʔaḥkuuseeš, tušaakitʔii. waaʔaƛ. waamitii. qaḥʔeey waamitquu. susšiƛ̓aɬ qʷayac̓iik. |
| 114 |
Kaxmatqšiʔaƛ q̓ʷaaxtii. ʔayaak ʕimtii. kʷatyaat, ʔukɬaa qaɬaatik. kamatquk. ʔuuwaʔaƛ ʔuuʔuuquk. suxkʷiƛ ʕuy̓ic̓akʔi, hiist̓iƛ ʔaḥ p̓atqsac̓isukʔi. kʷisaqsitʔaƛ̓aɬ. c̓ixčiʔaƛ ʔaḥʔaa qʷis, ʔiiwačiʔim c̓aʔak. ʔiiwačiʔim. heey c̓aačiƛ. |
| 115 |
ʔuḥʔat. haa sukʷiƛ sačk̓aḥsukʔi, qʷis ʔaḥʔaa. nism̓iičiƛ. nuučyuučiƛ. ʔayacsapi naʔaa. naʔaaƛ q̓ʷaaxtii, ʔuuuu, sayiiḥstʕaƛ. wik̓aƛ ḥaʔukʷiƛ. ʔuuktisʔaƛ̓atʔiš q̓ʷaaxtii, hisiikʔitq kamatquk misšiʔaƛquuč qʷaa ʔaḥʔaa. misp̓uuqsy̓iḥat ʔin waw̓ik kamatquk. |
| 116 |
Waa ʔayisaqsiɬaw̓it̓asʔaƛ č̓aastimcm̓it. ƛaʔiiƛa ʔucpaanuʔaƛ ʔaḥ. ʔuuḥʷ̓aɬʔaƛ qacaasʔatʔi qʷisʔaƛ ʔaḥ, ʔuukʷiɬ ʔaḥ, c̓isimcʔi, nuučyuučiƛ. ʔaʔiiwačiƛaq nuučyuu. kamatqšiʔaƛ wiikst̓iiḥ ʔuncukʷitii, n̓upčiiɬ, ʔaƛčiiɬ, qacc̓ačiɬ, muučiiɬ, ḥayučiɬitquu. |
| 117 |
Kamatquk. wik waʔičuƛ. ʔaay n̓aacsa ʕaʔukšiƛ ʔaḥ ʔaʔiiḥ. kamatqšiʔaƛ. histaqšiƛitquu ʔaḥ, hitaqƛiɬ huʔacaqsit, qʷaaqčiik̓aƛ ʔaḥʔaa ʕumaaʔap, ʕuy̓aakʔi, ƛaqmisukʔi. c̓aʔakšiʔaƛƛa kxaa kamatqšiʔaƛ ƛawaʔiiʔaƛ̓atƛa huḥtak̓aƛ̓iš č̓aastimcm̓it q̓ʷaaxtii ʔin p̓usaak̓aƛ qʷayac̓iikʔi. |
| 118 |
Wiinap̓iƛ ʕuqšiƛ, ḥuspiičiʔim waaʔaƛ, ʔiiwačiƛ. kamatqšiʔaƛ. hininckʷaƛ ʔaḥʔaawaʔiš qʷayac̓iik naqmiiḥičiƛ naqšiƛ. qʷayac̓iikʔi qʷaaʔamitii wiiy̓a c̓ic̓uqšiƛ, ʔaanaḥʷ̓aaɬ č̓up̓atʔi naaqnaaqa. kaxmatqšiʔaƛ wiikst̓iiḥ. ƛawačaƛ̓at. |
| 119 |
ʔukʷinuʔaƛ, ʔaaḥʔasa čaʔakquu, čaḥtaakquu. kaxmatqukʔis. wiinap̓iʔaƛ č̓aaxstimčm̓it. cusšiƛ. cusšiƛ. kʷaʔiiƛ waxšiƛ̓ic̓aƛwaʔišƛa huf! mušsaap, wimacsap qʷaaʔapʔaqƛ̓ick ʔaḥʔaa qum̓aa kʷiisqšiƛ ʔum̓aack ʔiqsiɬa susp̓iɬʔaƛ ʔayiiy̓ap̓aƛ nuučyuu |
| 120 |
Sayaʔiiʔaƛ qʷiʔiimitii ʔuuktis hupaɬ. kʷisiɬaƛ hupaɬ. ʔucpaanuʔaƛuk ʔaḥ. ʔatqʷin ʔucpaaʔak ʔaḥ hupaɬ. ʔucpinƛ ʔaḥ qacuut̓atʔi. ʔuucaapi ʔaḥ tuč̓iicpa. n̓aacsa kʷisiɬa hupaɬ. qacuutšiƛ. qʷiʔiimitii hiɬitii. huuʔaan̓uuƛ. č̓aastimcm̓it. |
| 121 |
Kamatquk. wiikaƛšiʔat sayaʔii qʷayac̓iikʔi. huuʔaan̓uuƛ, ʔatquu suspʔiɬ. ʔunackʔisit. saxyackšiʔi, sayaʔiiʔisqak, k̓uuʔii, nism̓aʔi. kamatquk huuʔaan̓awiʔaƛ čaanaaƛquuč waaʔič̓iƛ k̓icšiƛ. heey ƛimkšiƛ. kamatquk hisiikʔaɬ nuučyuuʔi. |
| 122 |
C̓aʔak t̓aapsʔataƛquuč, wikmaḥsat huḥtakšiʔat hisiikʔi. sayaʔii ʔuušyuuya, ʔuušyuuya taakaan̓uuƛ. qʷayac̓iikʔi hayimḥi qʷaaʔapii č̓aastimcm̓it q̓ʷaaxtii ʔuuwaʔaƛƛa ƛaʔuu, ƛaaʔuktaqapiʔi qʷayac̓iik. wik ʔiiḥ, ʔučknaḥʔis qʷaaʔiitq čamiḥtaʔi qʷayac̓iik qʷiqitii t̓aatn̓aʔisitquu. |
| 123 |
Hamipšiʔat hiy̓aaʔa ḥaa. suw̓aaqʔick č̓aastimčm̓it, waaʔaƛ̓at. wik. ʔukɬaas kapkimyis waaʔaƛ. ʔukɬaas kapkimyis. ʔuuʔiiʔaƛ̓iš ʕimtii qaɬaatikukʔi. suw̓aaqʔick, waaʔat. wiks. wiks. wiks. ʕuxyaayiswaʔiš č̓aastimčm̓it. n̓aacsiičiƛ ḥaa kuḥ. |
| 124 |
Kuḥ. č̓uq! ɬipḥiiʔiƛ̓isquu č̓uq! heey taaƛtaaya qʷaqʷaasʔi qaaḥšiƛ n̓aacsiičiƛwaʔiš p̓aʕimʔi, hiiɬapi ḥaa m̓aʔatap, m̓awaḥsuɬʔap hiiʔaḥsatʔi nuutxaan̓uup c̓iwaapukʔi haa qaxḥšiƛ̓isʔiš, qaḥšiƛ̓iš q̓ʷaaxtii, waaʔaƛ naʔaa ʔin ƛatw̓iičiƛ, č̓apac ʔunaak |
| 125 |
Wooox qʷaay̓akšiƛ̓is. ʔaaxʔaniḥtaak, ɬaaxqɬaʕiḥtaa, c̓iixc̓iyupuuk, p̓aaxp̓aʕimʔaay waaʔaƛ. haa haa ʔaaxʔaniḥtaak, haa haa c̓iic̓iiyupuuk, huu huu p̓aap̓aʕimʔay, waa waamitii tušaakitʔi. c̓iišcy̓ak, waʔaƛ. kamatʕaqƛ̓iƛ č̓aastimcm̓it haw̓iiqstuʔaƛ huuʔak huʔaɬ. |
| 126 |
Hitinʕuʔaƛ yaaɬwaaʔiš ʔaḥ hask̓aamac ʔaya. Woo, qaxḥšiƛwaʔeen, waa. hiihiitawaʔiik ʔuʔukʷiɬʔat. qaḥšiƛwaʔiš hiihiitawaʔiik. heey taačkʷaʔap̓ič ḥiyiiḥi, waaʔaƛ. haa, tiič̓ap̓is, waaʔat. wiiksas p̓ip̓išwa. ƛuƛuɬwasʔaaɬ suutiɬ, waaʔaƛ c̓awaak. |
| 127 |
Qʷiqitiit ḥaakʷaaƛ. wik̓iitšiƛ hask̓aamac. wiikmaɬ, c̓aawumɬ. ʔuušckʷaap̓atƛa qʷisʔap̓at ʔuuwaƛ ƛaʔuu. wik̓aƛ haʔukšiƛ, ʔaƛiičiƛ. ʔaḥ qʷis huʔacačiƛ kʷisaqsʔi. wikiipaƛ. wikiipaƛ̓atƛa č̓aastimcm̓it. ʔaḥʔaaƛitwaʔiš ɬučnaakšiʔaƛ. |
| 128 |
Wik, ʔuʔup̓iqš. ʔuʔup̓iqš muuḥinƛas. nay̓aqnakšiƛ muuḥinƛas hiitinqsaʔee ḥaawim̓eet ʔaaniik suuw̓aas t̓aan̓ee, ɬicw̓isee ɬicw̓isee muuḥinƛas. waaʔaƛquuč. čiskatšiʔaƛquuč ḥakʷaaƛ̓i. ʔuušyuuya nay̓aqakʔi m̓učquuƛ. wikuks n̓uw̓iiqsu. |
| 129 |
ʔaayačiɬ, ʔiinaxy̓aƛ ḥaaw̓iiḥaƛ, hiyiqsatḥ, naaḥtač ƛutƛuuɬʔi ḥaaw̓iiḥaƛ, naaḥtačm̓it, ḥuksumm̓it, muučʔaaʔa, qʷištuupʔitq. hišsiik̓at qum̓iisʔitq maatmaas. haa ʔaanimɬ c̓awaakšiʔaƛ. hitinqsaʔee č̓aastimcm̓eet qʷaaxyiik ʔaani suxʷ̓aas t̓an̓ee. |
| 130 |
Hitinqsaƛwaʔiš q̓ʷaaxtii ƛ̓iixmaquɬ yaacšiƛ. yaacšiƛ, waa ʔatquu wiiy̓a yaacuk. muuxkmuukʷaʔis. qʷaaʔak ʔaḥʔaa yaaci. sukʷiƛ č̓aastimcm̓it. ʔucḥinƛ ƛuɬaqakʔi ḥakʷaaƛ, muuḥinƛas. čuu, maʔiičiƛ ʔacšiʔin, ʔacyuuʔaƛquuč. ʔuqsʔaƛquuč č̓aastimcm̓it ḥiix hišyuuya muuɬukʔaƛquu. |
| 131 |
ʔaniya ʔuuy̓ip̓at ḥiix ḥaay̓aaƛquu ḥuuɬ ʔax̣yuuʔaƛquu nuusčii, t̓uc̓up. ḥačiy̓imštupʔi, p̓aʕim, ʔaya, ʕiičnuu ʔuḥuk haʔum. qʷaaʔap, t̓apsčiʔaƛ č̓aastimc. t̓apsaa. qiiyuuk̓ʷaɬšiʔaƛ. n̓aacsiičiƛ ɬuucmaʔi ʔin čimc̓aqak. haʔuk, haʔuk. |
| 132 |
Wičsiɬaʕaaš. haʔuk nuusčii ʔuʔiic. hinicʔaʔa, wikiimits, waaʔaƛ. wixk̓iitʔiš, wixk̓iiʔiš. hee, t̓apsčiʔi, čaaqʔatap. t̓apsčiƛ. hee ʔuyaasiɬawaʔiš c̓ic̓išiičiƛ. c̓ic̓išiičiƛ muuḥinƛas. ƛiḥšiƛ. wik sayaʔii. waḥšiƛs suutiɬ, waaʔaƛ, c̓iisḥhiiʔick. |
| 133 |
ʕaʕaqƛ̓akƛee waaʔanitquu. ƛiiḥšiƛ muuḥinƛas, wik sayaʔii. qaacuk qaačuk ḥaaɬ t̓an̓aʔisʔi. qačaa ʔuʔukʷiɬʔaƛnišʔaaɬ ʔučknaḥʔisʔi maamaati. qʷaaʔukʔaɬ mataa qačaa. qiiʔaƛ, qiit̓an̓aƛ, qʷiyuckʷiʔitq qʷis ʔaḥ. siikc̓inƛ, siikaa hitac̓inƛ maaqtusiis. |
| 134 |
Yuupickʷimatak, yuupi, yuksaaʔa. qʷiyimtii n̓aas, hitac̓inƛ. hitac̓u ʔukɬaakʔakna y̓uuqʷaa. waɬyuu, maaqtusiis, wiiḥaaqsusiis. ʔuʔiiyačištckʷi wiiḥaaqsusiis, t̓ayuukʷiƛ, kuunaa. wik ʔiiḥ. wikckʷii ʔiiḥ. ʔaƛa, ʔaƛista. qacc̓istamitquu. |
| 135 |
Hinaačiƛ̓aɬ, yaqitii. ʔin ʔutwiickʷiʔaaɬ hinaačiƛ, wiʔakʔi, wiiʔaksaʔi, ḥaaʔak̓atʔi ɬim̓aqsti. ʔin naʔaackʷaƛ, ʔaya, mamaɬn̓i, hisiickʷiʔitqʔaɬ hiistiƛ ciqy̓ak, čiinuukʔatḥ. čiičiinukʷackʷaƛ ʔuuš. hist̓atḥckʷaƛukʔaɬ ʔaḥ. |
| 136 |
Yaqʷiiyii naʔaaʔaƛ, Captainmitquu, yaqʷacʔitq šipʔii. t̓ayuukʷiƛ. ʔun̓aaḥniš, haptuup, waaʔat. haptuup. ʕaḥmis, ʕaḥmis waaʔatƛa ḥaaɬ, histaqšiƛ̓i tup̓aɬ. čuu, hinaačiƛ̓aɬ, maakʔatu, k̓ʷak̓ʷaƛ, hiyiqstup waaxnii. ʔuušckʷii ʔunaak ƛ̓itḥaq. |
| 137 |
Yaaqʷiɬqin ƛ̓itḥaq, čimsaʔaq waa. qʷiqʔiitq, qʷiqʷinakʔitq quuʔas, mak̓atu. čaanimtwaʔiš ʔaapḥii. mamaɬn̓imtquu ʔaapḥii. naqsaap̓aƛ̓atquučʔaɬ, č̓aʔak. kʷiisḥiip̓aɬ č̓aʔak. waa, ʔuušyuuyaƛ ʔaḥʔaa, tea, ʔuʔiic̓ap̓at, naqšiƛ. |
| 138 |
ʔayimsckʷak, mamaɬn̓i piskit, x̣ax̣ašk̓uk waanaa, x̣ax̣ašk̓uk. qʷaaʔap hiinačiiɬ, ḥaʔuyat, yaaqʷiɬitiiʔaɬ quuʔas ... twiidin waa. twiidin. twiidin. twiidin. čuu hinaačiƛ, hicnup, ƛ̓aaʔaa histaqšiƛ. ʔunaak k̓ʷak̓ʷaƛ. wiiksaʔiš ʔiiqḥuk yaqukʷitiis naniiqsu. |
| 139 |
ʔanuwa kaʔupšiƛ hicnupista, hicnup. nay̓iik̓atwaʔiš kʷiisḥiiʔat. hinaasipḥʔat̓aɬ, kʷiscaʔapʔaƛ̓at ɬuucmaʔi, kʷiscaʔap̓at čakupʔi. č̓ušaa quuʔasʔi. č̓ušaa. ʔanasiɬat hiniiʔat qʷiyiiʔanitii k̓acḥaq. qum̓aamitii k̓acḥaq. wik ʔiiqḥuk. |
| 140 |
ʔaniwa waa. k̓acḥaqstup, hiyiqstup, ƛišƛiqy̓ak. qʷaamitii ƛišƛiqy̓ak huuʔak. ʔiinaxyaƛquuč ʔuušyuuya, ʔiiḥ ḥaw̓iɬ, yaqʷacʔitq šipʔii. ʕiḥak ɬuucmaʔi hiniiʔas. ʕiḥak. ʔaaʔaaʔišaʔi waa čakupuk, ʔaaʔaa hitaqsiƛ č̓apac, ƛiḥšiƛ. |
| 141 |
Hitac̓inƛ, kʷispaa waanaa. kʷisutaqtuʔi maaqtusiis. hitac̓inƛ. p̓iyačiƛw̓it̓asʔaaš ʔiiqḥy̓ak, ʔatquu čačimḥimt čaani, p̓iyačiƛ, wičsiɬa. wičsiɬaʔiš waa. nay̓iik, nay̓iik ʔuušsuuqstuƛ quuʔasʔi. nay̓iik ʔuušsuuqstuƛ. ƛiḥšiƛ. |
| 142 |
Wičsiɬackʷiʔaaš. wičsiɬa. ʔunicuk̓ʷaaɬitii, wiiqḥap, wiiqsiɬa, witwaakʔi. niiʔatapnaaš, niiʔatapnaaš waaʔaƛ. hitac̓inƛ, maaqtusiis. niiʔatuʔaaš, niiʔatu, p̓atʕaḥs, qʷiqitii m̓uč̓ičtup. caqšiƛ, kuunaaʔi. caqšiƛ. wiiḥaaqsusiis hiɬqḥ. |
| 143 |
Wiiḥaaqsusiis ʔukɬaa. čuu, ƛ̓aaʔinuʔat̓aɬ, ƛ̓aaʔinƛ, n̓uʕasaqḥ, ʕaaḥuus, hitaaqƛis. č̓itaapi ʔuḥ waɬyuu. č̓itaapi ʔaḥ ʔaqʔištiik, hiɬukʔaɬ mamaʔuu, waa qiɬcmaʕatḥ. waa ƛ̓aaʔaatḥ qiɬcmaʕatḥ. wik, wik, wik niiy̓aaqsta qiɬcmaʕatḥ qʷisʔiitq ʕaaḥuusʔatḥ. |
| 144 |
Tačkʷaʔap. tačkʷaʔap kuunaaqčisʔi. wik ʔunic, ʔunicitii, hitasaƛ, č̓apac, ʕaaḥuus. x̣unusčiʔatḥ. niiyya histaqšiƛ, hinataʔas. hinataʔas. čuu, čuu, ƛiiḥšiƛ, siikšiƛ. siikaa. siikaackʷiʔaɬ, hačɬii(ƛ) ʔuuktis, hačy̓aaʔa. ʔaniyat čačimḥat k̓uučukʔic̓at hačɬiiʔaƛquu qʷaa. |
| 145 |
Huuʔaciiy̓ukʔaƛquu tuč̓ii. ʔunicitii. ƛ̓iipiƛ, ʕaaḥuusʔatḥ. ƛiipiƛ. wičsiɬaʔaaš quuʔasʔi, ʔiinaxyu, ʔukʷič ʔiinaxyu, Admiral waacimʕat m̓uč̓ičtupukʷitquu. t̓iqʷiɬ hiiɬ. n̓aacsiičiƛ quuʔasʔi. paway̓in kuunaa. paway̓in. n̓aacsiičiƛ, ḥamipšiƛ qʷik̓ʷičʔitq, kinčoočʔatḥiicckʷi. |
| 146 |
Kinčoočʔatḥ, yaqitii ḥaw̓iɬ yaqukʷitiiʔaɬ ḥaw̓iɬ England ʔaḥʔaa ʔuyi. kʷisuuqʔatḥ, waaʔat. kʷisuuqʔatḥ, Europeans. waamitʔiš ʔaḥʔaa naniiqsakitqs, kʷaatya Annie ʔukɬaa. ʔuḥuk n̓uw̓iiqsu w̓iikinaniš. qʷaʔiɬʔaƛquu ʔaḥʔaa ʔiicʔiiqḥaƛquu yaqukʷitii naniiqsu, kʷaatya. |
| 147 |
ʔiicʔiiqḥaƛquu. wik ƛ̓iixsnacuɬ. ʔuušmaquɬ. ʔin wičsiɬackʷiʔaɬ. ʔam̓iičiʔaƛ ƛ̓iipiʔaƛƛa. ʔuusḥhy̓imsʔi, ƛiḥšiƛcuu, ƛiḥšiƛcuu. ḥamipšiƛ̓iš, yaqʷʔičʔitq quuʔasʔi, waaʔaƛ kaʔupšiʔat. kaʔupšiƛ. ʔuyiʔičim ƛiiḥšiƛ tuupšiʔaƛquu. |
| 148 |
Waa ƛiḥšiƛ. tumaqstuʔaƛ. ƛatw̓aa. k̓ʷačšiƛwaʔaaš, yuupuƛ. qʷiyumtii ʔimc̓ak, waa ʔucuut. ʔatḥii. siikaa. ʔuʔumḥičiƛ, hitaquuʔa ʕaaḥuus, c̓iiqaa. c̓iiqaa. y̓imqimy̓uuƛneeš waa. p̓išaqʔiš ʔiiqḥy̓ak. šiƛstiisʔičim waaʔaƛ. šiƛstiisʔaƛ. |
| 149 |
Šiƛstiisʔaƛ. hač̓a ḥaʔiičḥšiʔaƛit, ʔin ʕaakʷaašt ʔukʷiiɬckʷat ƛ̓uukʷiɬ ʔaya. ʔucačiƛ, c̓ikt̓aqis, mučačiɬḥ, wap̓uuqḥ, ʕaaḥuusʔatḥ. waʔuus. waʔuus hiiɬsasakʔaɬ mamaʔuu, ʕaaḥuusʔatḥ waʔuuc. hiʔiis ʔaḥʔaa, kapčaa. kapčaamitquu. |
| 150 |
Kapčaa. kapčuk. ḥaw̓iɬ, ʔuuc nuučaan̓uɬ, kapčuk. yaaqʷiɬʔitq nuučaan̓uɬ waa, ƛaaḥaqsak. nuučaan̓uɬ. ʔiiḥcamisukƛaʔaɬ ʔaḥ ḥaw̓iiḥ. c̓awiic nuučaan̓uɬ. hitasaƛnakʔaɬ. hašiičiʔaƛ, hupic̓atḥ, načiqs, minwaaʔath, t̓ayuučišt. |
| 151 |
Minwaaʔath. wiina ʕaaḥuusʔatḥ ʔuuciy̓uk. wiksan̓apw̓it̓as. ʔuuqstiiʔat quuʔas, ʔaƛa. ʔucačiƛ waʔuus n̓aacsa, hitac̓usat̓itq. kaƛḥak. ʔayaaƛ ʔuušp̓aɬak. nay̓iik̓atwaʔiš ƛ̓iicƛ̓iiyat. mwmwmwmw. bamm. šaxšiƛaƛquu. waa šaxkʷačiƛ. |
| 152 |
Puuqƛ̓iƛ, kamatʕaqƛ̓iƛ. kamatʕaqƛ̓iƛ. hiɬ qaaḥma. ḥaaw̓iɬaƛ̓aƛ qaaḥma. fifteen, sixteen, seventeen, eighteen yearsʔaƛquu, twenty. ḥaaw̓iɬaƛ̓aƛ qaaḥma. wikstup̓ap. ƛiiḥšiƛ minwaaʔath. c̓aʔak ʔucačiƛ. čaʔis. kamatqʷaqtu. |
| 153 |
Kaamatʕiiḥšiʔat. qaaḥma ʔukɬaamit, yaqitii t̓an̓ackʷi, qaaḥma. saaʕaʔaaɬ. t̓aapsʔatu qaaḥma, č̓uq! ƛ̓ičiʔat, bang, bang qacc̓iiqp̓it ʔuḥʔiš ʔaƛa, qum̓aakʷiʔat ʔaḥʔaa, bullet yaaqḥʷ̓aɬʔitq, ƛ̓ičiʔat ʔana puxʷ̓isaʔi k̓acḥaq |
| 154 |
Puxʷačišt ƛ̓ičiʔatƛa mamaɬn̓i. t̓apsčiƛ, č̓uq! č̓uq! ʔaaḥʔasa waaxniiʔis č̓aastimcʔisḥquu t̓apsčiƛ sayaaʔiš yaqii ʔapquuʔa sayaa ḥaaɬ nism̓a c̓aaʔuʕaqƛis huḥtak qaaḥma ʔin, qʷaaqʷaacy̓akʔitq c̓aʔak m̓uksy̓i ʔuqƛn̓ukʷiƛ ƛ̓ay̓ixʔatʔiš m̓uksy̓i ʔuqƛn̓uk̓ʷat |
| 155 |
Yaackyaacka. hitaqƛsaƛ. hiy̓aaʔa čaʔisʔi. piḥšiƛits. y̓aaqn̓aqckʷiʔišʔaɬ. y̓aaqn̓aqckʷiʔiš quuʔas. wik hišuk. wik hišuk. y̓aaqn̓aq. kamatʕaqƛ̓iƛ, qaaḥma. ɬiʔaaʔap̓at ƛ̓ičiʔat. wik ʔuusuqta. tiič. tiič. tiič. kamatqšiƛ, ʔucačiƛ ḥuuɬ, hiɬḥuuʔasʔi. |
| 156 |
Sayaa k̓uuʔii ʔunaamitii. čuu, kʷisutaqtinƛ̓aqniš waaʔaƛ ƛaʔuukʷiʔatḥʔi. ʔunačaqtuʔis. yacaaqtu, ʔuʕiʔatwaʔiš, yaqitii quuʔas, yuxsitk ʔuucitwaʔiš, nanaʔiqsu. ʔaʔiič̓imckʷak yuxsitk, ʔucḥimtʔiš yuxsitk yaqukʷitiis naniiqsu, kʷaatya. |
| 157 |
Ḥaʔukʕiʔat, mačinƛ ƛaʔuukʷiʔatḥʔi. k̓aḥkʷaʔap̓atuk ƛ̓aḥiqs qʷinaakitiiʔaɬ, qʷic̓uuʔakitiiʔaɬ huupaqʷanim. wukʷiƛ ƛaʔuukʷiʔatḥʔi, ʕakʷaašt ʔaaniiƛ. waasiḥ waaʔat kaʔupšiʔat, waasiḥ kapčaa. waa hayimḥiniš hiɬii waaʔaƛ. |
| 158 |
Huʔaaqtuʔaɬ, minwaaʔathʔi. huʔaaqtu, ɬuuč̓inuʔaƛ̓itq. x̣ickʷaʔap̓atuk maḥt̓iiʔakitʔi. x̣ickʷačiƛ. wik̓iitšiƛ. k̓aḥšiƛ. k̓aḥkʷačiƛ č̓apac qum̓aamitii. k̓aḥkʷaʔap̓atuk, ʔuʔumḥičiƛwaʔiš quuʔasʔi. takstiisckʷi. n̓uupc̓iqmaaɬ č̓apac. |
| 159 |
Yakquuʔa n̓aacsa qʷaaʔapʔitq. n̓aacsa. hitasaƛ. haptkʷačiƛ̓aɬ. haptšiƛ̓aɬ. ʔucačiƛ, ʕiiʕiiɬmak̓ʷas ʔukɬaaʔiš. c̓aaʔuʕaqƛisʔiš ʔaḥ. k̓ʷačšiʔaƛƛa muuɬšiƛ, muuɬuk. haptšiƛ ḥuuɬ hiinaan̓uɬ. c̓aʔakʔisʔiš ʔaḥʔaa. haptšiƛ. waɬaakckʷatʔiš č̓itaapi. |
| 160 |
Hity̓atḥ, ʔayaʔatḥ, č̓itaapi. ƛ̓iicƛ̓iiya hitasaƛ. k̓aḥkʷačiƛ č̓apac. ƛaʔasitwaʔiš hiy̓iis ʔaḥʔaa. yaaqʷiɬʔanitiiʔaaɬ waaʔat, ƛaakišpiʔiɬ. ƛaakišipiʔiɬ. qʷisitii ʔink̓ʷiy̓ap. ʔink̓ʷičiƛ. wiikmaɬ maḥt̓ii. wiikmaɬ. ƛ̓iicƛ̓iiya, baan baan. |
| 161 |
Wikʔaqs. qiʔiicuu hitaaqƛ̓iƛcuu waaʔaƛ, quuquuʔasʔi. ʔanackʷiwaʔiš ʔiič̓iʔisʔi hiɬn̓iiqis ʔiič̓imʔis. naʔaa. n̓an̓ačmap qʷaaʔap̓atʔitq. wiikmaɬ maḥt̓ii. wik̓iit maḥt̓ii. hišuk č̓apac, kiƛkʷačiƛ, k̓aḥyaqis. waa ʔuuy̓ip̓at, miimixt. |
| 162 |
Maʔiƛkacʔis miimixt. waa ƛaʔuu, čuuwin waaʔat. čuuwin, quʔaciicuk y̓uuqʷaa ʕimtii čuuwin. ʔaaƛiiʔat, wukʷiʔat. ʔuuc kapčaa t̓an̓a. huʔacačiƛ. ƛaʔuukʷiʔatḥ ʔuusʔaƛƛa. ḥampi yaqʔiitq, ʕaaḥuusʔatḥ. ḥamip. huʔacačiƛ načiqs waɬaak Tofino ʔuʔiiyačišt hinaačiʔaƛ ƛaʔuukʷiʔatḥ. |
| 163 |
Hinaačiƛ, minwaaʔathʔi. ḥamipšiʔat, miimixt. yaqitii, miimixt ʔukɬaa, n̓aacsas. kiiƛa ʔukɬaa, kiɬamaxin. sukʷiƛ, ḥaw̓iɬuk ƛaʔuukʷiʔatḥ,. sukʷiƛ, miimixt. tuuḥšiƛ, čuuwin. tuuḥšiƛ. ʔuuʔithɬckʷatʔišƛa mixtukʔis, mixtukʔisitwaʔiš c̓awaak. |
| 164 |
Miixtuksa. ʔiič̓imʔaƛs wikstup̓aps waaʔaƛ. yaqy̓iiḥaʔitq čuuwin, ḥaʔak̓at ɬim̓aqsti, ḥaaw̓iɬaƛ̓i. sukʷiʔat ḥaʔakʔanits ɬim̓aqsti waaʔaƛquuč mixtukʔi, ʔuyiʔaƛ̓atquuč naqsaap̓at, qʷišaa. tea ʔuʔiic̓ap̓atč̓aʕaš qʷaa. teaʔiic. |
| 165 |
Qaaḥsap̓atsaaš waaʔaƛquuč. ʔuušyuuyaƛquuč čamas, teaʔii. mituuni waɬaak, siikšiƛ. siikšiƛ. ƛiḥšiƛ waaʔap̓is, ƛiiḥšiƛ, qʷaamitii ʔinkʷasitquu. ʔinkʷasckʷimatakʔaƛ, pitišʔatḥ. pitiš. pitiš waa, minwaaʔatḥ. pitiš. wicikʔaɬ British waa. |
| 166 |
Pitiš. pitiš. ʔiiḥcamisʔap. ʔuy̓iiḥaƛƛa ʔiḥcamisʔap, ƛ̓iḥmaɬqim. ʔunaak̓ap̓at. ʔuḥʷaaʔiš ʔaqʔištiik, sword. qʷisqaač̓a qʷisitii yaqitii swordmuutquu. č̓it̓uuɬ ʔuʔukʷiɬʔaɬ. č̓it̓uuɬ. qiiyuuk̓ʷaaɬ, quuʔasʔi mituuni waɬaak. |
| 167 |
Qiiyuuk̓ʷaaɬ. huʔacaʔap̓at, ʔuum̓aanup̓at n̓ačiqs, hisuɬtap̓at. ʔiicʔiiqḥaƛ qʷaaʔap̓anitiič. ʔuqɬaapckʷi qaḥsaapw̓it̓asʔatq, ʔatquu ʔaniic̓ap̓at, tea waaʔatquu. tea. waa ʔuušyuuya saačksit, qʷiʔiic̓ap̓anitii, ʔin ʔanaak ʔanackʷak naqtuup minwaaʔath. |
| 168 |
Namwaa. nam. Rum. ʔuʔiic̓ap̓aƛ̓atquuč c̓aaḥʔii, x̣ax̣ašk̓uk ʔuʔukʷiɬna. piskitckʷimatakuk. ʔuʔiic̓ap̓aƛ̓atquuč ḥusp̓aɬʔi. c̓isqmis ḥusp̓aɬ. ʔaḥʔaa qʷisitwaʔiš. c̓awaakitwaʔišča ɬuucma, ɬuucmumtquu, k̓aḥyaqisʔap̓anitwaʔiš. |
| 169 |
K̓aḥyuu. n̓usx̣is niiʕaḥs. ʔiič̓imʔis k̓aḥyaqisʔap̓anitwaʔiš niistiƛ ʔaḥ qaan̓imʔatʔi. waa, t̓uḥc̓iti, k̓aḥkʷačiƛ y̓uuqʷaa. k̓aḥyuu. kisšiƛckʷat. qʷisckʷii, qiickʷiiʔaɬ, wik, huʔaas, makʷink, k̓ʷak̓ʷaƛ, hiyiqstup. k̓ʷak̓ʷaƛ. |
| 170 |
Wik. ɬačiƛ̓aɬ. ɬačiƛ. ʔaʔanačinkšiƛckʷaƛ, ƛaʔuuʔi qʷiq yaqitii, maakʷaa. waa quʔacasitwaʔiš, quuʔas c̓awaak ʔaḥ hiɬaas, yaaqʷiɬʔanitiič qaḥsaap̓at. tiičmaḥsamitwaʔiš c̓awaak. wiiqsiɬaƛwaʔiš qaaḥsaap. ḥačatsuup. ʔuušmisnakcimnis waaʔat. |
| 171 |
ʔatquu ʔuušmisnak̓aƛ̓aɬ. ʔaḥʔaa kʷisckʷii. wičsiɬackʷiʔaɬ. ʔuckʷiis kinḥuuɬ. ʔuckʷiis kinḥuuɬ, ʔukčiiɬ kʷaatya, yaqukʷitii ɬuucma, kʷaatya ʔukɬaa. ʔunaakʔaɬ t̓aatn̓a. t̓an̓anakšiƛḥit, m̓aan̓uuʔisʔatḥ kinḥuuɬ ḥaw̓iɬ čaamat̓a, ʔunaak ḥaaḥuuɬʔi. |
| 172 |
ʔunaak nuučaan̓uɬ. ʔaḥʔaaƛ, yaqukʷitiis ƛaʔuu naniiqsu, ʔuucuw̓at n̓uw̓iiqsakqs, yuuwii ʔukɬaamit, k̓uučʔis n̓aacsa yaqukʷitiis naniiqsu, yuuwii waa, č̓iḥtaap ʔukɬaa, č̓iḥtaap ʔukɬaa. ƛaʔuuʔak ʕimtii. histaqšiƛ ƛ̓ic̓aaʔatḥ, ƛ̓ic̓aaʔatḥ. |
| 173 |
Haa qʷaaniiš. haa qʷaaniiš n̓uw̓iiqsakqs nananiqsakqs, kʷaatya, kinḥuuɬ yaqukʷitii ɬuucma, qiɬsmaʕaqsup, qiɬsmaʕaqsup. qʷaa y̓uuqʷaa w̓iikinanišitquu qiɬsmaʔatḥit ʔaanaḥaƛ ʔin kʷaatya. naniiqsak, naniiqsakitq histaqšiƛ yaʕaƛ̓itqʔaɬ ʔačaq m̓ukʷina, m̓ukʷina. |
| 174 |
? ʔaaḥʔasa ʔiʔišpaaɬ ʔišuukquu ʔuy̓iiḥinč ʔuḥtinmit ʔišc̓iipm̓ititquu ʔaḥʔaa čaanaaƛs himwic̓iičiƛ qʷisḥitiič hiʔiisitwaʔiš ʔišc̓iipm̓it nism̓aʔi hiɬ ƛawaaquḥaa, ʔaɬmaʕa ʔukɬaa hiy̓atḥ, ʔaya ḥaa, hiy̓atḥ maʔas ɬučnaakšiƛ ʔišc̓iipm̓it ʔacyuuʔaƛ̓uuč ʔuʔuʔiiḥ ƛ̓iḥapiiḥ |
| 175 |
ʔuyiʔisim ƛimksaap hupkʷistaʔaƛquu hupaɬ waa, hupkʷistaʔaƛquu hupaɬ waʔičswi ḥakʷaaƛ̓i, waʔičswi. suučiƛ waa. suučiƛ. qiičiʔaƛs suutiɬ ḥaaḥuupa naʔuuk ʔacšiƛna ʔayaaƛ suuḥaa July ʔuyi August ʔaya ʔaḥʔaaƛ ʔunic hawiiʔaƛ. |
| 176 |
Hiiɬʔaƛ̓iš ʔaḥʔaa. kʷiisqšiƛ̓aaš ʔaƛin, ʔaƛin Toshi, ɬuucmaak. k̓aac̓iƛs. qʷiinuuƛḥiič wiiy̓aat haw̓aaḥinʔat saštup. ƛaac̓umwaʔiš ʔaḥ qʷisnaak. kuukuḥʷ̓isa ʔuʔuʔiiḥʷ̓it̓asitwaʔiš čakupʔi. yaacšiƛ ʔaʔumštup kaƛḥʔaqstuƛ. |
| 177 |
ʔucaḥtačiƛ hiy̓aaʔaʔitqʔaaɬ naaw̓aḥaƛ hinusaƛquu kuukuḥʷ̓isa. wiinap̓aʔaƛ ɬaḥʔas naaw̓aḥi. n̓aacsiičiƛ čakupʔi ʔuuštup maɬšiƛ̓aʔa. hiy̓aaqstas ʕamaʕasʔi. wik qiiḥsn̓aak hinusa kuukuḥʷ̓isa ʔuukʷiiqsta husmin. t̓aapsʔatu yaaqʷin̓ak̓uuḥšit̓itq čakupʔi. |
| 178 |
N̓aacsiičiƛ ʔan qʷayac̓iik. ʔuucaḥtaksa hinkʷay̓iiḥšiƛ kuukuḥʷ̓isaʔi. hiniipšiƛ qaḥsaap. susaaʔaƛ hiniic wiḥčisan̓ap ʔucaʔap sup̓icisʔi. c̓ušiʔaƛ, c̓ušiʔaƛ. hatkc̓usan̓ap̓aƛ kuukuḥʷ̓isakʔi. tuukʷiičsan̓ap̓aƛ. hatkhatkmisaƛ qʷayac̓iikʔi, wiimatsapa qʷiʔiiʔisʔapʔitq kuukuḥʷ̓isakʔi. |
| 179 |
Sayiisaʔaƛquuč ḥuu ḥaam̓aamaḥasak ʔan wiimatisuk. huʔaasʔaƛquučƛa hatkhatkmisaƛ. mukšiƛ qʷayac̓iikʔi hit̓aaqƛ̓iƛ. mamaasuɬqčik haaʕin yaaʕaaɬčiqḥʔitq. wiktum naaw̓aḥi čakupʔi. tuxkʷist̓aʔa ʔuucaḥtaksa. c̓uskʷisan̓ap kuukuḥʷ̓isaʔi hiniic waɬšiƛ. |
| 180 |
Č̓iʔakʷay̓ap siqiiɬšiƛ ɬuucmaʔi. huʔaḥt̓asʔaƛ qʷayac̓iikʔi. hiniic yaaqʷiɬitʔitq haaw̓awiiqš. wikisʕiʔaƛ kuukuḥʷ̓isakʔi. mismiisʔaƛ̓at qʷicaḥtačiƛitʔitq yaʕatukʔitq kuuw̓iɬʔat haʔum. ʔuucaḥtaksa hiy̓atḥʔitq čakupʔi. mitxumy̓iƛ̓aɬ hiy̓atḥʔitq čakupʔi hiɬʔiitq hicnup̓aqƛ̓as. |
| 181 |
Hiʔiis qʷayac̓iikm̓inḥʔi. mitxʷaaʔaɬ maḥt̓iiʔak čakupʔi. qiičiiɬšiʔaƛ̓itqʔaɬ tuuḥuk hiniiʔas. ʔayipiʔaƛukʔitq tums, ʔuyaaƛ waay̓aqstuƛ ɬuucmaʔi ʔan wiiwiik̓ity̓ak, ʔan wiiksa ʔuḥ kuuw̓iɬ kuukuḥʷ̓isaʔi. hiniiʔas tumyaap. |
| 182 |
Wiksiɬat. ʔuyaaƛ t̓apatnakšiƛ čakupʔi. maḥt̓aqasukʔaɬ hiy̓atḥʔitq hiistwasukʔitq qʷišckʷii. sukʷiƛ xaaʔamin. hinumsinƛ hiniic puu. y̓akʷaas. ƛ̓isumɬaq ḥaw̓iɬmatakukʔiʔaɬ. ƛ̓ičiƛ ʔuḥtaa ƛ̓isumɬʔi qaḥsaap. nay̓iik w̓ašqšiƛ mamaasuɬšiƛ. |
| 183 |
Hiiɬtqyaap̓up ʔaƛa qʷayac̓iik. mamaasuɬqčik̓aƛ̓aɬ hiitaqƛ̓iƛ. nay̓iik ƛ̓iptkšiƛ hicnupʔi hitawiiʔis. wik̓ap̓at qiiʔatḥ hiinaʔaƛ̓atƛa qʷayac̓iikštaqumɬʔi. čuu ʔaqiscumḥin waaʔaƛ čakupʔi. wikʔaqƛ̓atsa ɬačiʔat ʕaciis qʷicačiƛuusin. |
| 184 |
Haaʕinčiʔi t̓apatḥsim̓inḥukqin. sukʷiƛ̓asnak̓atuk t̓apatḥsiʔi. hišumyipiƛ̓aɬ t̓aat̓aapatšiƛ. ʔun̓aaḥʔi numackʷiqaɬquu hiiɬciiʕasʔap. qʷis čakupʔi waaʔatʔitq. ʔaani tuuḥšiƛ qʷayac̓iikm̓inḥʔi. huʔaaqƛ̓iƛ ɬačiʔat. ʔaḥʔaa ʔuunuuƛwaʔiš wiiy̓aat hinaaḥinʔat haʔum saštup. |
| 185 |
Čuu ʔuuqḥɬiʔaqƛs qʷisḥitiič quuʔas hiniip ʔink. wik̓iitukʷitwaʔiš ʔink quuʔas huuʔak ʔuyi. wik̓iit qʷiiḥʷ̓aɬʔaaḥiiʔaɬ siqiiɬ. ʔana ʔunaak ʔink qʷayac̓iikštaqumɬ. tuḥʔinʔaɬ qʷayac̓iikštaqumɬ. ʔayup̓it quuʔas n̓amiɬšiƛ hiinip ʔinkʔii. |
| 186 |
Wim̓aaqƛ̓aƛquučʔaɬ ƛawiičiƛ. huuʔasšiiɬ, huʔinʔaƛquučƛa, wim̓aaqƛ̓atʔiš waa. čaa waa kaƛḥšiƛ hisumyisʔiswaʔiš ḥaa muwaačm̓it ʔumč̓aap. naʔaa ʔan ciiqciiqa ḥaa ʔuuʔasm̓inḥʔi čaakupiiḥ ʔanč wim̓aaqƛ̓at ƛawiičiʔat hiy̓atʔitq qʷayac̓iikštaqumɬ. |
| 187 |
Yacinsʔiiʔaƛ qučknaḥiy̓uɬʔisʔi muwaačm̓it ʔuʔumḥis hiinipčip siiḥiɬ. ƛ̓iixc̓uy̓inčiʔaƛ muwaačm̓it. ʔaqisḥcumč ʔuʕašt waaʔaƛ̓at, wim̓aaqƛukna haa ʔaʔiiḥp̓itukqin hiinip ʔinkʔii, ƛ̓iixc̓uy̓inʔaƛ. huʔaasʔaƛƛa waa muwaačm̓it hiinipčipʔaqƛ siiḥiɬ ʔink waa. |
| 188 |
ƛ̓iiw̓aaqičiiɬšiʔaƛƛa. haa n̓amiɬsap̓i waaʔaƛ ḥaw̓iɬʔi n̓amiɬsap̓i. čuu waaʔaƛ̓at. ʔee nučḥakšiƛ̓ic̓aƛ x̣ax̣ čaaxtšiƛ muwaačm̓it. čuu ʔun̓aaḥčip̓is qʷik̓ʷičḥʔaaḥiis huuɬhuuɬa. ʔusumʔaqƛsiš w̓anus, c̓iisiicum, maamaƛ̓aasum, mamaƛp̓ičḥtum. |
| 189 |
ʔuukʷiiɬʔap̓i waaʔaƛ ḥaw̓iɬʔi, ʔuukʷiiɬʔap̓i qʷiqʷisumyii. hee, mamuukšiƛ ɬuucsaamiiḥ. wik qiičiƛ ʔusiikʔaɬ qʷiqʷisumʔitq. hee m̓uč̓ičuƛ muwaačm̓it. čuu ʔusumʔaqƛsiš yaqʔaqƛii nunuuk waaʔaƛ muwaačm̓it kutḥsii. naʔuukʔaqƛ̓atsiš, ʔaanaḥiʔučum siiḥʷiiʔiɬ waaʔaƛ. |
| 190 |
Hii, yaacšiƛ̓aɬ nunuukqčik, kuutḥkuutḥaqčik. čuu, ʔiiqḥukʔaqƛs siiḥiɬ qʷiyuʔaqƛiisuu kamatqšiƛ waaʔaƛ. haptaaqčikʔic̓aƛ ʔuḥ ʔukʷink̓aƛ ḥaa nunuukm̓inḥʔi. hii, ƛawiičiƛ̓aɬ hiy̓atḥʔitq qʷayac̓iikštaqumɬ. čuuč, waaʔaƛ kamatqšiƛ̓ič waɬšiƛcuu. |
| 191 |
Wee, kamatqšiƛ̓aɬ munuukm̓inḥitʔi. hii, nunuukʔic̓aƛ muwaačm̓it huyaaɬ. n̓aacsaaʔat qʷayac̓iikštaqumɬ. ʔaqaqḥ waaʔaƛ ḥaw̓iɬuk qʷayac̓iikštaqumɬ, ʔaqaqḥ. haa, ʔuḥʔisʔiš muwaačm̓it šuuɬhuuɬa ʔiinaxyuʔis waaʔaƛ qʷayac̓iik. |
| 192 |
Haa, ḥumqaaʔapči. čaʔaaɬči, ḥumqaači waa. haa, wiinapap̓i waaʔaƛ ɬuucmaakʔi ḥaw̓iɬʔi wiinapap̓i. ḥaaɬm̓aḥiʔisʔiš huuɬhuuɬap̓i, kuw̓iɬa waaʔaƛ. čuu, mačinup̓i waaʔaƛ ḥaw̓iɬʔi. mačinup̓aƛ̓aɬ. nunuukšiƛ muwaačm̓it. huuɬḥuuɬaʔic̓aƛ, ƛaawičiƛa ʔinkʔii. |
| 193 |
ƛaƛaʔis hamuut sasačk̓iḥta, hišaacu ḥaa ʔinkʔii, wim̓aaqƛ̓at ƛawiičiʔat. ʔaanaḥi y̓ay̓aaqḥiʔis yayaacinkstisʔaƛ ḥaa, wik ʔuusuqta. wee, ƛawiičiƛ. wee tuxcpaa ʔinkʔii. wik̓aƛ̓aɬ hinʔaɬuk qʷisʔiitq qʷayac̓iikštaqumɬ. tuxcpaa muwaačm̓it ʔinkʔii, kamatqšiƛ. |
| 194 |
Wikʔaɬʔaƛ̓aɬ ʔan hiinip. ʔink̓ʷičiƛuk ḥaa ƛ̓ušukʔi ḥumiis. paaƛ̓iƛ ʔinkʔii hiinip̓aƛ, hinin hiy̓atḥʔitq. ʔiiḥʔaƛ̓aɬ nučḥak ʔuʔumḥičiƛ̓aɬ siqiiɬ, ʔuʔumḥičiƛ kaƛḥʕaqstuƛuk ʔuʔumḥičiƛtaaɬʔis. ʔuy̓iiḥawaʔiš tupkak̓at muwač hiiɬtqyaap̓aɬ qay̓apt̓a, ʔunw̓iiƛḥ ʔan hiniicckʷi ʔinkʔii. |
| 195 |
Čuu. kačiʔat ʔuunamaḥsap̓atʔitq č̓apac, qacc̓iiɬ, muuy̓aɬ, suč̓iiɬ, n̓upuuɬ, ʔaƛpuuɬ, ʔaƛakʷaɬ, c̓awaakʷaɬ, ḥayu, ḥayup̓it, hiikʷaɬ, quušcpaamatak sixty feet ḥayup̓itʔat ɬaaḥšiʔat. ʔaḥʔaaʔaƛ ʔaḥ, mamaɬn̓i ʔuusatukukʔi mashiin, powersaw ʔuuḥʷ̓aɬʔaƛ ƛaḥ, ƛaḥ katḥhakʔi. |
| 196 |
Kamatʕaqƛ̓asitʔaɬ, ʔucačiʔaƛ maaqtusiis, ʕaaḥuusʔatḥ yaaqʷiɬʔitq waaʔat, qucačiƛ. paaʔiƛ kaɬa, paaʔiƛ kaɬa ʔee muwaačm̓it taɬa ʔee muwaačm̓it taɬa, wawaaʔisuk nuuk huuɬhuuɬa. čuu qʷiyuyii ʔinxaa ʔuyickʷaƛ ʔaqʔištiik hišumy̓uup ƛ̓ušuk ḥumiis, ʔucaʔap̓aƛ ʔaḥ qay̓apt̓atʔi mamaƛp̓ičumʔatʔi. |
Комментарии