| 1 |
Зонкалы сетӧмны Тюнь ним. Сэки йӧзыс общинаӧн на овлӧмны, некымын семья – ӧтув. Весиг шулӧмны зонкалӧн бать-мамыслы мынтӧдчыны татшӧм кагаысь, но жалитӧмыс мамыслӧн вӧлӧма ёнджык. Быдмысь зонкаӧс коді кыдзи пыдди пуктылӧма. Унджыкӧныс – лёк вӧчтӧмӧн лыддьылӧмны да жалитӧмны. Мӧдъяс тыр вежӧртӧм морттӧ вӧйсӧдлӧмны. Быдмигас Тюньӧс челядь тшӧкыда дӧзмӧдлӧмны. Та вӧсна сылӧн медся бур ёртъясӧн вӧлӧмны понъяс, кӧзаяс, вӧрса лэбачьяс да ичӧт зверьяс. Кӧть и ӧлӧдӧм пуктылӧмны, а зонка гусьӧн петавлӧма потшӧс пытшкысь. Дас вит арӧс тыртігас Тюнь зэв нин бура тӧдмаліс матысса вӧр-васӧ да лунтыр вермис шӧйтны парматі, ворсны радейтана визяордакӧд. Кужліс вӧчны медшӧр уджъяс: видзны-дӧзьӧритны кӧзаясӧс, заптыны турун да пес, катлыны тшанъясӧ ва, перйыны сёй, а гӧриг-кӧдзигӧн куйӧд кыскавны. Мӧд пӧлӧс уджъяссӧ сылы эз сетлывны вӧчны. А мукӧд том зон отсасисны мужичӧйяслы кыйны чери да вӧравны, вӧчны дозмукъяс, стрӧйба нуӧдны, ректыны ю дорысь турун пуктанінъяс, паськӧдны кӧдза муяс, кокйӧмӧн вӧчавны пипу пыжъяс. |
| 2 |
Тшӧкыд парма шӧрын, зумыд кыръя горулын, ылын заводитчӧ тайӧ ёльыс. Шулӧмаӧсь сійӧс Кутш ёльӧн. Кӧть нёль воськов пасьта, но чериа. Мык, налим да ком ӧнӧдз кыйлӧны йӧзыс. Вылӧ кайигӧн паныдасьлӧны дзормӧм горсъяса да сирӧсь потасъяса нэмӧвӧйся ниа да пожӧм пуяс. Сэтысь, мазі позъясысь, коркӧ чукӧртлӧмны ма. А водзӧ кӧ нӧшта мунны, позяс аддзывны джынвыйӧ буждалӧм-тырӧм джуджыд гуяс, кытчань кыйсьысьяс вӧтлывлӧмаӧсь кӧръясӧс да ошъясӧс. Уна кыйдӧс промышляйтлӧмны. А вотӧс да тшаксӧ во гӧгӧр кежлӧ вотлӧмны! Вердысь ёль ас ногыс сӧвмӧдіс и йӧзлысь олӧм-вылӧмсӧ. Но ӧти воӧ, виччысьтӧг, йӧзсӧ суис неминуча. Гожӧм пуксьӧм бӧрти град выв пуктас тшыкӧдлысь уна шыр да гаг рӧдмис вӧлӧсьт гӧгӧрын. Муяс вылысь сю пакӧститісны, куысь вурлӧм кӧлуй кумысь розьӧдлісны, жытникъясысь шыдӧс да мукӧд сёян пежӧсьтісны. Быдсяма ногӧн войтыр шыр-гагысь мездысьны видлісны, но немтор эз артмы. Унаӧн лёк дука быдмӧгьяс сотлісны да тшынӧдлісны гӧбӧчьяс, кумъяс, оланін пытшкӧссӧ, а керка гӧгӧр ортсы стенсӧ мукӧдыс весиг сирӧн мавтлісны. |
Комментарии