| 1 |
Yaz vakıdıydı. Yaz dediynän, sanmayalım, ani bizdä olan yazlar gibi yazdı. Diil, Rusiyada ölä sıcak yaz olmaz. Ama genä da yazın ortasıydı, açan bän tanıştıydım Antoniylän. O manastırda yaşardı, ama taa monah diildi. Otuzu taa tamannamamış kurgaf hem balaban bir adamdı. O vakıt beni koyduydular yaşamaa 19-cu asirdän bir evdä, angısı, Sovetlär manastırı kapadıynan, saa kalan üç yapıdan biriydi. İki katlı, eski, diil pek gözäl bir evdi. Baştan o konakmış, neredä kalarmış manastıra gelän hacılar yada evä olmayan insannar. Sovet adamnarı, manastırı kapayıp, baş kliseyi hem duarları yıktıynan, bu erdä küçük bir küüçääz kurmaa istemişlär. Birkaç tufla ev düzmüşlär da orayı insannarı geçirmişlär, eski evleri da yıkmamışlar, onnarı da insana vermişlär (sansın taa ileri orada yaşayan olan monahlar, angılarını ya öldürüp, ya koolayıp, yok etmişlär, diildi insan). Açan vakıtlar diişildi, bu manastır enidän açıldı. Ama ilktän manastırın sade vardı. Yavaş-yavaş hepsi yapıları düzüldü, kliselär kaldırıldı, dua başladı. |
| 2 |
Sora o girdi başçaya da başladı siiretmää çiçekleri. Hederlez ayının ortasında havalar sıcaktı, açtı çoktan hepsi çiçeklär başçada. Kızçaaz diiyärdi ellerinnän büük kırmızı, sarı, pembä laalelerä, kadifä altıncıklara, türlü renktä zümbüllerä. O pek şaşardı bu gözellää, kokardı çiçekleri. Aulların üstündä, toplanıp sürücük, şen cıvırdardı kuşlar. Olicik kendisi dä pek şendi: yalpak güneş yısıdardı onun suradını, başçanın çiçekleri pek gözäl kokardılar – onun içi doluydu sevinmeliklän. Uşak, güleräk, dolanardı çiçeklerin arasında, seslärdi kuşların cıvırdamasını. Bir dä kuşçaazlar birdän sustular da başladılar korkuylan bakınmaa. Aulun üstünä atladı bir büük kedi da başladı yavaş sürünmää kuş sürüsünä dooru. Kuşçaazlar birdän fırladılar erlerindän da daalıştılar her tarafa. Birazı kondu fidannarın en üüsek dallarına, birazı tellerä. Ama bir küçücük kuşçaaz oturdu tokatçıın geniş trubasına, da Olicik esap aldı, ani o kuşçaaz tutunamadı çetin incä yalabık trubanın kenarından da düştü o trubanın içinä. |
Комментарии