| ЧӀвачӀва Эдуард. Чыр |
| 1 | Акъанджьаква атриуау гӀащтӀырхын апшцӀа йгӀайуаз ацӀла йхъачӀван. Ауат рбыжь цӀараквала йшгвмачӀуаз, гвжвайыгӀвакӀ шрылаз гӀаугвынгӀвуан. Зынгьи апшцӀа ахъахьла йахъыпссгӀауа, зынгьи адгьыл тшгӀаквырпсауазшва йалагьагьасун, рыцхӀагӀарадзакӀ йашӀашваз рапшта акытчкӀвын агьагьара гӀатдрыхӀвачвгӀун. Апхын акъанджьаква чыр ангӀалырдуз агӀамта агӀвсхьан. Ужвы ауат рчырква йпссгӀарныс тшадрыщцун. Марйат абыжь цӀараква щажьы дгӀадыршӀыхатӀ. |
| 2 | Ауи агваны дангӀаджвылцӀ атдзы апахь йщтӀаз акъанджьачыр гвы алттӀ. Ауи дангӀадгыл апхьынцӀыгӀва хвыц шшӀчӀваз лбатӀ. Марйат дщтӀастӀ, ачыр гӀащтӀылпгӀгӀан атдзы йналгылтӀ. АцӀла йхъачӀваз акъанджьаква ацӀахьы тшгӀакӀадрышвызтӀхӀва ауи йгьылхьымдзахтӀ. Марйат акъанджьачыр днахьпшыгӀахьпшын апхьынцӀыгӀва шӀалхӀватӀ, асхъа тшыткӀгьи акӀвлыршан ащчыкь хвыц йталырчӀватӀ. АцӀла йхъачӀваз акъанджьаква рбжьы гьашӀадымрысуазтӀ. |
| 3 | Ауат акъанджьачыр йазыпшгӀун. МачӀкӀ анахъыцӀ Марйат акъанджьачыр дзтӀакӀвгьи алрыжвтӀ, чӀахъва рыпса тӀакӀвгьи алрыфтӀ, ащчыкьгьи ацгвы ъанамдзуш кӀарышвтакӀ йыквлыргылтӀ. МчыбжьыкӀ аъара дайъазатӀ Марйат акъанджьачыр, «Чыр»-хӀвагьи ахьылцӀахын ауаса дапхьун. Псайспамцара Чыр тшагайхуа йалагатӀ. Марйат ауи апещ ауацӀа йынкъвылжьуан, сабикӀ йапш дачважвун. МачӀ-мачӀымцара Чыр апещ апны йпссгӀауа йалагатӀ. |
| 4 | АпссгӀара йшазыхӀазыру, акъанджьаква йрылалхра шатахъу гӀаунардыруан. Ауи азаман зымгӀва акъанджьаква апшцӀа йгылаз ацӀла йгьхъымцӀтӀ. МышкӀы Марйат Чыр гӀалахвтӀ, дгӀаджвылцӀын ацӀла ду ацӀахь псайспадза йауылщттӀ. АцӀла йыквчӀваз акъанджьаква гвыргъьаракӀ гӀарныпщуата йалацӀыруа йалагатӀ. Чыргьи тшаршвшватӀ, апхьынцӀыгӀваква гӀванхын йакъьан йшзыпссгӀуш архъвыхуазшва тшгӀащтӀнахын ацӀла акъвадамакӀ йыквчӀватӀ. |
| 5 | Марйат ауи дапшуа дгылан. Акъанджьа хӀвычагьи – Чыргьи рылата – зынла тшгӀащтӀырпгӀан Марйат лхъахьла гӀван-хын гьагьата йылхъыпссгӀан ажвгӀванд чӀыхв йалалхтӀ. Адзын гӀаталтӀ, ацӀла швырква йрагӀахатӀ. МышкӀы апшцӀа аквтабырг апны Марйат йдуквата хпа-пщба раса гӀащтӀылхтӀ. Марйат ауат «зджьакӀы йгӀарцрышвтзапӀ» – хӀва лгвы йгӀанагтӀ. Ауаса ауи амщтахьгьи мшигӀадза жваба йайхӀата, йалыхта араса дуква заджвы лыпшцӀа йгӀатшкӀарайпсауа далагатӀ. |
| 6 | Марйат ауат ъагӀайуаз гьгӀалгвнымгӀвуазтӀ, ауаса арасаква азылкӀкӀуанта апщырхӀа йталпсун. МшквакӀла апщырхӀа йазнахатӀ. Марйат лыгвлачвагьи ларгьи йзнымкӀва йалачважватӀ ари агӀаншара. МышщыбжьанкӀ лыгвла КӀатӀа агвара дгӀадгылын араса лхӀватӀ: «Бара Марйат акъанджьаква бзи бырбитӀ. Щымтипхьадза раса бызгӀаргитӀ». Марйатгьи дпшвырхъыччан: «ГӀвпщырхӀакӀ расата йсызгӀаргхьатӀ», – лхӀватӀ. УацӀыхъвангьи йацылцӀахтӀ: «Чыр акӀвпӀ ауат сызгӀазгуа». Ауи амщтахьгьи Марйат лыгвлачва щардала йырбалун акъанджьаква ауи лыпшцӀа араса дуква шгӀакӀарпсуз. |
Комментарии